पुणे: दुकानात निघालेल्या साडेअकरा वर्षांच्या मुलीचे दुचाकीवर अपहरण करून तिच्यावर बलात्कार केल्याचा धक्कादायक प्रकार समोर आला आहे. अपहरणाचा प्रकार वारजे भागात घडला तर बलात्कार उत्तमनगर येथील एका लॉजवर झाल्याचे उघडकीस आले आहे. या घटनेमुळे शहरात खळबळ उडाली असून महिला सुरक्षेचा प्रश्न ऐरणीवर आला आहे.
याप्रकरणी अपहरण करणार्या दोघांसह लॉजच्या मालकासह तेथील मॅनेजरवर गुन्हा दाखल करण्यात आला आहे. याबाबत पीडितेच्या वडिलांनी वारजे माळवाडी पोलिस ठाण्यात फिर्याद दिली आहे. राहुल गौतम (रा. वारजे), अविनाश डोमपल्ले (24, रा. वारजे), पिकॉक लॉजचा मालक भगवान दत्ता मोरे व लॉजचा मॅनेजर टिकाराम चपाघई यांच्यावर गुन्हा दाखल केला आहे.
21 मार्च रोजी दुपारी साडेबारा वाजण्याच्या सुमारास साडेअकरा वर्षाची मुलगी रस्त्यावरून दुकानात जात होती. या वेळी आरोपी राहुल गौतम आणि त्याचा साथीदार मित्र अविनाश डोमपल्ले या दोघांनी तिला जबरदस्तीने दुचाकीवर बसवून अपहरण केले. त्यानंतर ते तिला उत्तमनगर येथील पिकॉक लॉजवर घेऊन गेले. तेथे राहुल गौतम याने तिला तू माझ्याशी लग्न कर नाहीतर तुला मारून टाकेन अशी धमकी दिली.
त्यानंतर तिच्यावर बलात्कार केला. मुलगी दहा वर्षांची असतानाही आरोपी राहुल याने तिच्यावर बलात्कार केला होता, असे फिर्यादीत म्हटले आहे. तर अविनाश डोमपल्ले याने, तू राहुलसोबत लग्न कर नाहीतर वाईट होईल, अशी धमकी दिली. तर भगवान मोरे व टिकाराम चपाघई यांनी मुलगी अल्पवयीन असतानाही तिच्याबाबत कोणतीही खात्री न करता तिला राहुल याच्यासोबत खोली देण्यास हरकत घेतली नाही. त्यामुळे या प्रकरणात चौघांवर हा गुन्हा दाखल केला आहे. पुढील तपास वारजे माळवाडी पोलिस करत आहेत.