सिंहगड रस्त्यावरील विठ्ठलवाडी ते फनटाइम या दरम्यानच्या उड्डाणपुलासाठी 10 कोटींची आवश्यकता असून, यासंबंधीचा निधी वर्गीकरणाद्वारे मिळावा, यासाठी लवकरच स्थायी समितीसमोर प्रस्ताव ठेवण्यात येणार असल्याची माहिती प्रकल्प विभागाच्या अधिकार्यांनी दिली.
नरवीर तानाजी मालुसरे (सिंहगड रस्ता) रस्त्यावरील वाहतुक कोंडीची समस्या सोडविण्यासाठी महापालिकेने राजाराम पूल चौक ते फनटाइम थिएटर यादरम्यान अडीच किलोमीटर लांबीच्या उड्डाणपुलाचे काम हाती घेण्यात आले आहे. राजाराम पूल चौकातील एक उड्डाणपूल सुरू झाला असून, विठ्ठलवाडी ते फनटाइम या दरम्यानच्या उड्डाणपुलाचे काम सुरू आहे. या पुलाचे काम 86.50 टक्के झाले असून, 85.1 टक्के आर्थिक प्रगती झालेली आहे. या कामासाठी 2024-25 च्या अर्थसंकल्पात 55 कोटी रुपयांची तरतूद होती, ही रक्कम डिसेंबर 2024 मध्येच संपली आहे.
विठ्ठलवाडी ते फनटाइम थिएटर या दरम्यान उड्डाणपुलावर रस्ता करणे, कठडे बांधणे, रंगरंगोटी करणे यासह अन्य कामे शिल्लक आहेत. त्यासाठी मे 2025 पर्यंत 23 कोटीचा खर्च अपेक्षित आहे, पण प्रकल्प विभागाकडे 13 कोटी रुपये उपलब्ध आहेत. त्यामुळे 10 कोटी रुपये वर्गीकरणाद्वारे उपलब्ध करून द्यावेत, असा प्रस्ताव प्रकल्प विभागातर्फे स्थायी समितीपुढे ठेवला जाणार आहे.
दरम्यान, खडकवासला ते हडपसर या दरम्यान मेट्रो मार्गाची उभारणी करण्यात येणार आहे. मेट्रोचे काम करताना उड्डाणपुलाचा रॅम्प फोडावा लागू नये, यासाठी उड्डाणपुलांच्या चढ व उतराच्या ठिकाणी एकूण 39 मेट्रो पिलरचे फाउंडेशन तयार केले जात आहे. मेट्रोच्या या कामासाठी एकूण 32.93 कोटी रुपये खर्च येणार असून, सध्या खर्च महापालिका करत असली, तरी भविष्यात तो महामेट्रोकडून वळता करून घेतला जाणार आहे.