वाडा : वाडा तालुक्यात बुधवारी संध्याकाळच्या सुमारास सोसाट्याच्या वाऱ्यासह आलेल्या मुसळधार पावसाने हाहाकार माजवला असून शेकडो घरांचे अतोनात नुकसान झाले आहे. तालुक्यातील अनेक गावांमध्ये मोठमोठी झाडे वाऱ्यामुळे उद्ध्वस्त झाली असून महावितरणचे देखील मोठ्या प्रमाणात नुकसान झाले आहे.
बुधवारी संध्याकाळच्या सुमारास सोसाट्याचा वारा व मुसळधार पाऊस सुरू झाल्याने जनजीवन विस्कळीत झाले. वाऱ्याचा वेग इतका होता की त्यामुळे तालुक्यातील अनेक गावांमध्ये घरांचे मोठे नुकसान झाले. तालुक्यातील चिखले, सावरखांड, अबिटघर या परिसरात वाऱ्याचा वेग अधिक असल्याने ६० ते ७० टक्के घरांचे नुकसान झाल्याचे स्थानिक सांगतात.
मांडा, भोपीवली, खरीवली, पिंपळास, हमरापुर या भागात देखील वाऱ्याचा वेग प्रचंड असल्यामुळे ५० ते ६० टक्के घरांचे नुकसान झाले असे स्थानिक सांगतात. खरीवली ते मांडा व पिंपळास या गावांकडे जाणाऱ्या रस्त्यावर अनेक झाडे उन्मळून पडल्याने वाहतूक विस्कळीत झाली. सर्वात मोठे नुकसान महावितरणचे झाले असून जवळपास चार ते पाच फिडरचे मोठे नुकसान झाल्याचे विद्युत अधिकाऱ्यांनी सांगितले.
घरांवर झाडे कोसळून पत्रे, भिंती व आतील साहित्याचे अतोनात नुकसान झाले असून सुदैवाने कुठेही जीवितहानी झाली नाही. महसूल विभागाने तातडीने पंचनामे करून नुकसान भरपाई द्यावी अशी मागणी केली जात आहे. आ. दौलत दरोडा यांनीही वाडा तहसीलदारांना पत्र लिहून तशी मागणी केली असून पंचनामे करण्याच्या सूचना केल्याचे तहसीलदार भाऊसाहेब अंधारे यांनी सांगितले.