पालघर : वसई तालुक्यातील नायगाव रेल्वे स्थानकाच्या पूर्व भागात मालजीपाडा गावाच्या पश्चिम भागातील बेटातील झुडपात सुरु असलेले हातभट्टी दारू निर्मितीचा अड्डा उध्वस्त करण्यात उत्पादन शुल्क विभागाला यश आले आहे.हातभट्टी निर्मिती अड्डयावर कारवाई दरम्यान 70 लिटर हातभट्टीची दारू,आठ हजार 800 लिटर रसायन मिळून तीन लाख 67 हजार 200 रुपयांचा मुद्देमाल जप्त करण्यात आला आहे. याप्रकरणी अज्ञात आरोपी विरोधात दारूबंदी अधिनियमा अंतर्गत गुन्हा दाखल करण्यात आला आहे.उत्पादन शुल्क विभागाच्या विरार निरीक्षक कार्यालय आणि भरारी पथकाकडून कारवाई करण्यात आली आहे. (Palghar Latest News)
वसई तालुक्यातील नायगाव रेल्वे स्थानकाच्या पूर्व भागात मालजीपाडा गावाच्या पश्चिम भागातील बेटातील झुडपात हातभट्टी दारू निर्मितीचा अड्डा सुरु असल्याची माहिती उत्पादन शुल्क विभागाच्या कर्मचार्यांना मिळाली होती.उत्पादन शुल्क विभागाचे विरार निरीक्षक कार्यालय आणि भरारी पथकाकडून संयुक्तपणे हातभट्टी निर्मिती अड्डयावर छापा टाकण्यात आला.हातभट्टी निर्मिती अड्डयावर हातभट्टीची दारू आणि दारू तयार करण्यासाठी लागणारे रसायन आढळून आले. दारू आणि रसायन जागीच नष्ट करण्यात आले.कारवाई दरम्यान तीन लाख 67 हजार रुपये किंमतीचा मुद्देमाल जप्त करण्यात आला आहे.
कारवाई उत्पादन शुल्क विभागाच्या विरार कार्यालयाचे निरीक्षक संजय सराफ आणि भरारी पथकाचे निरीक्षक अरुण चव्हाण यांच्या नेतृत्वाखाली दुय्यम निरीक्षक भालचंद्र सपकाळ,महेश तावरे,जवान रोहन मर्टीस,अनिल पाटील, बोडके आणि शेळके यांच्या पथकाने केली.उत्पादन शुल्क विभागाच्या विरार कार्यालयातील जवान अनिल पाटील यांना मिळालेल्या गोपनीय माहितीच्या आधारे कारवाई करण्यात आली.