नाशिक / कळवण : पुढारी वृत्तसेवा
न नवरात्रोत्सवासाठी सप्तशृंगगडावर दाखल होणाऱ्या लाखो भाविकांच्या आरोग्याच्या दृष्टीने अन्न व औषध प्रशासनाने धडक कारवाई केली आहे. या मोहिमेंतर्गत १,४०८.७ किलो पामतेलयुक्त मावासदृश मिठाईचा साठा नष्ट करण्यात आला. या साठ्याची किंमत पाच लाख ६२ हजार १० रुपये असून, गडावरील विविध अन्न आस्थापनांची तपासणी करून अन्नाचे नमुने विश्लेषणासाठी घेण्यात आले.
अस्वच्छ वातावरणात वाहतूक व साठवणूक तसेच आवश्यक लेबलबिषयक त्रुटी आढळलेल्या अन्नपदार्थांवर प्रशासनाने कारवाई केली. अन्न व औषध प्रशासनाचे सहआयुक्त मंगेश माने यांच्या मार्गदर्शनाखाली आणि सहायक आयुक्त संदीप देवरे यांच्या नेतृत्वाखाली ही विशेष तपासणी मोहीम राबवण्यात आली.
नवरात्रोत्सवाच्या काळात सप्तशृंग देवीच्या दर्शनासाठी मोठ्या संख्येने भाविक गडावर येतात. या पार्श्वभूमीवर मिठाई विक्रेते, पेढा प्रसाद विक्री केंद्र आणि अन्य खाद्यपदार्थ विक्रेत्यांच्या आस्थापनांची तपासणी करण्यात आली. तपासणीदरम्यान पामतेलयुक्त मावासदृश मिठाईचा मोठा साठा आढळून आला.
अन्नपदार्थांची वाहतूक व साठवणूक असुरक्षित आणि अस्वच्छ वातावरणात होत असल्याने, तसेच आवश्यक लेबलबिषयक नियमांचे पालन होत नसल्याने जन आरोग्याच्या हितासाठी हा साठा नष्ट करण्यात आला. नष्ट केलेल्या मिठाईचे एकूण वजन १,४०८.७ किलो असून, त्याची किंमत पाच लाख ६२ हजार १० रुपये आहे.
या मोहिमेदरम्यान अन्नाचे नमुने प्रयोगशाळेतील विश्लेषणासाठी संकलित करण्यात आले. मात्र, कारवाईच्या तपशिलात नमुन्यांची संख्या १७ आणि १८ अशी वेगवेगळी नमूद करण्यात आली आहे. त्यामुळे अधिकृत आकडेवारीनुसार नमुन्यांची अंतिम संख्या स्पष्ट होणे आवश्यक आहे. मोहिमेत अन्नसुरक्षा अधिकारी एस. जी. मंडलिक, एस. एस. तोरणे, चेतन परदेशी, प्रतीक भड, सोनल पाडोळे, अक्षय गाडेकर, वैभव गर्दे आणि संकेत येलमामे यांनी सहभाग घेतला. नमुना सहायक सचिन झुर्डे व विजय पगारे यांनीही कामकाज केले. ग्रामपंचायत, विश्वस्त संस्थान आणि रोप वेच्या कर्मचाऱ्यांनी मोहिमेसाठी सहकार्य केले.