जळगाव : चाळीसगाव तालुक्यातील ७३ वर्षीय सेवानिवृत्त वैद्यकीय अधिकाऱ्याची तब्बल ३१ लाख ५० हजार रुपयांची ऑनलाइन फसवणूक झाली आहे. फसवणूक करणाऱ्या व्यक्तीने दिल्ली सीबीआय पोलीस असल्याचे भासवून वृद्ध अधिकाऱ्याचा विश्वास संपादन केला. या प्रकरणी जळगाव सायबर पोलीस ठाण्यात गुन्हा दाखल करण्यात आला आहे.
पोलीस सूत्रांनुसार, १६ जून ते २३ जून २०२५ या कालावधीत ‘सुनील कुमार’ नावाच्या व्यक्तीने सेवानिवृत्त अधिकाऱ्याशी संपर्क साधला. आपण दिल्ली सीबीआय पोलीस स्टेशनमधून बोलत असल्याचे सांगून, त्याने अधिकाऱ्याच्या बँक खात्याचा मनी लॉन्ड्रिंगसाठी वापर होत असल्याची बतावणी केली. या कौशल्यपूर्ण पद्धतीने त्याने वृद्ध अधिकाऱ्याचा विश्वास संपादन केला आणि त्याला वेळोवेळी विविध कारणांसाठी ऑनलाइन पद्धतीने ३१ लाख ५० हजार रुपये आपल्या खात्यात जमा करून घेतले.
फसवणूक झाल्याचे लक्षात आल्यानंतर, सेवानिवृत्त वैद्यकीय अधिकाऱ्यांनी तात्काळ जळगाव सायबर पोलीस ठाण्यात धाव घेतली आणि ‘सुनील कुमार’ नावाच्या व्यक्तीविरुद्ध फिर्याद दाखल केली. या प्रकरणाचा तपास पोलीस निरीक्षक सतीश गोराडे यांच्या नेतृत्वाखाली सुरू आहे. या घटनेमुळे सायबर फसवणुकीच्या बाबतीत नागरिकांनी अधिक सावधगिरी बाळगण्याची गरज पुन्हा एकदा उजेडात आली आहे. पोलीस प्रशासनानेही अशा प्रकारच्या फसवणुकीविरुद्ध सतर्कतेचे आवाहन केले आहे.