नाशिक : राज्य निवडणूक आयोगाने दिलेल्या कार्यक्रमानुसार महापालिका निवडणुकीसाठी आरक्षण निश्चितीची प्रक्रिया सुरू असून महापालिकेच्या निवडणूक शाखेमार्फत आरक्षित जागांचा अहवाल राज्य निवडणूक आयोगाला सोमवारी (दि. ३) सादर केला जाणार आहे. आरक्षण निश्चितीच्या नव्या नियमानुसार महापालिका निवडणुकीसाठी ओबीसींची एक जागा घटणार आहे. आता ३३ ऐवजी ३२ जागा ओबीसीसाठी राखीव असणार आहे. ओबीसीची कमी झालेली जागा सर्वसाधारण प्रवर्गासाठी खुली होणार असल्याची सूत्रांची माहिती आहे.
सर्वोच्च न्यायालयाच्या निर्देशानुसार महापालिकांच्या सार्वत्रिक निवडणुका होत आहेत. नाशिक महापालिका निवडणुकीसाठी २०१७ नुसारच प्रभागरचना करण्यात आली आहे. त्यानुसार चार सदस्यीय २९, तर तीन सदस्यीय दोन प्रभाग अस्तित्वात आले आहेत. गत निवडणुकीप्रमाणेच प्रभाग क्रमांक १५ व १९ हे तीन सदस्यीय प्रभाग कायम आहेत. उर्वरित प्रभाग चार सदस्यांचे आहेत. या निवडणुकीसाठी मतदार याद्यांचा कार्यक्रम जाहीर करण्यात आला आहे. त्यानुसार विधानसभा निवडणुकीसाठी निश्चित केलेल्या मतदार याद्यांचे विभाजन करत प्रभागनिहाय मतदार यादी तयार करण्याचे काम सुरू आहे.
५ नोव्हेंबरपर्यंत प्रभागनिहाय मतदार याद्या प्रसिद्ध केल्या जाणार आहे. आरक्षण सोडतीचा कार्यक्रमही जाहीर झाला असून चक्रानुकार पद्धतीने आरक्षण जाहीर केले जाणार आहे. त्यात सध्याच्या लोकसंख्येनुसार नव्याने प्रभाग निश्चिती केल्यानंतर उतरत्या क्रमानुसार अनुसूचित जाती - जमाती व इतर मागासवर्ग असे प्रवर्गनिहाय आरक्षण पडले जाणार आहे. त्यानुसार मार्गदर्शक सूचना जाहीर केल्यानंतर आयोगाने आरक्षण सोडतीचा कार्यक्रम जाहीर केला आहे. महाराष्ट्र महानगरपालिका प्रभागांत राखीव जागांचे वाटप करणे आणि त्या जागा चक्रानुक्रमे आरक्षण निश्चिती केली जात आहे. यातील नियम क्र. ५ मधील तरतुदींमुळे ओबीसीची एक जागा घटणार आहे. महापालिका निवडणुकीसाठी ओबीसी प्रवर्गासाठी ३३ ऐवजी ३२ जागा राखीव असती. ओबीसीची घटलेली एक जागा सर्वसाधारण खुल्या गटासाठी उपलब्ध होणार असल्याचे सूत्रांचे म्हणणे आहे.
या नियमामुळे जागा घटणार
महाराष्ट्र महानगरपालिका नियम क्र. ५ मध्ये नागरिकांचा मागासवर्ग प्रवर्गाच्या जागा वाटपाची पद्धत विहित केली आहे. या नियमातील तरतुदीनुसार प्रत्येक प्रभागात नागरिकांचा मागासवर्ग प्रवर्गाची एक अथवा अधिक जागा वाटप करण्यात येईल. नागरिकांचा मागासवर्ग प्रवर्गाच्या जागांची गणना करताना अपुर्णांक आल्यास तो दुर्लक्षित करण्यात यावा, असा नियम आहे. नाशिक महापालिकेत जागांची गणना करताना संख्या अपुर्णांकात येत असल्याने शेवटची एक जागा कमी होणार आहे.
10 नोव्हेंबरला आरक्षण सोडत
आरक्षित जागांची संख्या निश्चित करत त्यासंदर्भातील अहवाल सोमवारी (दि. ३) मनपा निवडणूक शाखेकडून राज्य निवडणूक आयोगाला सादर केला जाणार आहे. त्यानंतर आरक्षण सोडतीची सूचना ८ नोव्हेंबरला प्रसिद्ध केली जाणार आहे. १० नोव्हेंबरला आरक्षण सोडत काढली जाण्याची शक्यता आहे. ११ नोव्हेंबरला आरक्षण सोडतीचा निकाल आयोगाच्या मान्यतेसाठी सादर करण्यात येईल. त्यानंतर या आरक्षण सोडतीवर हरकती व सूचना मांडण्याची मुदत २४ नोव्हेंबरपर्यंत असणार आहे. प्राप्त हरकती व सूचनांवर विचार करून मनपा आयुक्त २५ नोव्हेंबर ते १ डिसेंबर कालावधीत निर्णय घेतील. आयोगाच्या मान्यतेनंतर २ डिसेंबरला अंतिम आरक्षण विहित नमुन्यात शासन राजपत्रात प्रसिद्ध केले जाईल.
अशी असणार आरक्षित जागांची संख्या
एकूण जागा - १२२
सर्वसाधारण - ६३
इतर मागास प्रवर्ग - ३२
अनुसूचित जाती - १८
अनुसूचित जमाती - ९