देवळा (नाशिक) : देवळा कळवण रोडवरील भऊर फाट्यानजीक बुधवारी (दि. ३) सायंकाळी साडेसहाच्या सुमारास आयशर व स्कुटी यांच्यात झालेल्या भीषण अपघातात दुचाकीवरील वरवंडी (ता. देवळा) येथील सासू व सून जागीच ठार झाल्या. तर त्यांच्या सोबत असलेले दोन लहान मुले गंभीर जखमी झाले.
देवळा पोलिसांकडून मिळालेल्या माहितीनुसार, बुधवारी (दि. ३) सायंकाळी साडेसहाच्या सुमारास वरवंडी येथील माजी उपसरपंच अनिता विलास शिंदे (५०) व चेतना अविनाश शिंदे (२८) या सासू सून, दोन मुलांसह मटाने शिवारातील शेतातून घराकडे स्कुटीने जात असताना कळवणहून देवळाच्या दिशेने भरधाव वेगाने येत असलेल्या आयशर वाहनाच्या मागील चाकात सापडून जागीच ठार झाल्या, तर गुरू (३), विधी (६) हे दोघे चिमुकले गंभीर जखमी झाले आहेत.
त्यांना पुढील उपचारासाठी कळवण व सटाणा येथील खासगी दवाखान्यात हलविण्यात आले. अपघातात ठार झालेल्या सासू-सुनेवर देवळा ग्रामीण रुग्णालयात शवविच्छेदन करण्यात येऊन रात्री उशिरा त्यांच्यावर वरवंडी येथे अंत्यसंस्कार करण्यात आले. अपघातग्रस्त आयशर चालक फरार झाला. विकास सोसायटीचे माजी चेअरमन व उबाठा गटाचे उपतालुका संघटक विलास शिंदे यांच्या त्या पत्नी आणि सून होत.