सिडको : पुढारी वृत्तसेवा- प्रतिबंधित तंबाखू विक्रीला बंदी असताना अंबड गरवारे पॉईंट येथे एमआयडीसी पोलिसांनी एका ट्रकमधून तब्बल १५ लाखांचा गुटखा जप्त केला आहे. याप्रकरणी दोघांना अटक करण्यात आली आहे.
महामार्गावरून मुंबईला तंबाखू तसेच गुटखा घेऊन एक ट्रक जात असल्याची गोपनीय माहिती एमआयडीसी पोलीसांना मिळाली होती. त्यानुसार पोलीस निरीक्षक मनोहर कारंडे यांच्या मार्गदर्शनाखाली गुन्हे शोध पथकाने गरवारे पॉईंट येथे बुधवारी पहाटे सापळा रचत आयशर ट्रक (सीजी ०४ एन डब्ल्यू ९०७६) येथे पकडला. या ट्रकची तपासणी केली असता त्यात पोलिसांना तंबाखू आणि गुटख्याचे १८० बॉक्स आढळले. या मालाची किंमत पंधरा लाख रुपये आहे. पोलिसांनी चालक सिताराम मकवाणी (वय ४६) व बबलू मकवाणी (वय १९) यांना अटक केली. अन्न औषध प्रशासनाचे अधिकारी पी. एस. पाटील यांनी दिलेल्या तक्रारीवरून अंबड पोलीस ठाण्यात गुन्हा दाखल करण्यात आला आहे.
हेही वाचा –