नाशिक (चांदवड) : पुढारी वृत्तसेवा
तक्रारदाराचे थकीत वेतनाचे बिल मंजूर करण्यासाठी व कोणतेही आक्षेप न घेण्याच्या मोबदल्यात १५ हजार रुपयांची लाचेची मागणी करत तडजोडी अंती १० हजारांची लाच स्वीकारताना चांदवडचे उपकोषागार अधिकारी सुनील तडवी (वय ४९) यांना नाशिक लाचलुचपत विभागाच्या पथकाच्या पोलिस निरीक्षक गायत्री जाधव-पाटील यांनी रंगेहाथ अटक केली.
नाशिक येथील ४९ वर्षीय तक्रारदाराचे थकीत वेतनाचे बिल मंजूर करण्यासाठी व कोणतेही आक्षेप न घेण्याच्या मोबदल्यात १५ हजार रुपयांची लाचेची मागणी तडवी यांनी केली होती. यात तडजोडीअंती १० हजार रुपये देण्याचे ठरले होते. यामुळे तक्रारदाराने नाशिक येथील लाचलुचपत विभागाकडे तक्रार केली होती. या तक्रारीनुसार गायत्री जाधव-पाटील, पोलिस नाईक प्रकाश महाजन, पोलिस नाईक नितीन कराड, परशुराम जाधव यांच्या पथकाने चांदवडला सापळा रचून तक्रारदार यांच्याकडून लाच स्वीकारताना तडवी यांना अटक केली. या प्रकरणी चांदवड पोलिसांत गुन्हा दाखल करण्यात आला आहे.