जळगाव : नाशिक विभागातील कुंभमेळ्याशी संबंधित कामांच्या नावाखाली सुमारे 500 ते 600 कोटी रुपयांच्या बनावट वर्क ऑर्डर तयार करून ठेकेदारांना गंडा घालण्याचा प्रयत्न केल्याच्या प्रकरणाने आता जळगाव जिल्ह्यातील जामनेरपर्यंत धागेदोरे पोहोचल्याची चर्चा आहे. या प्रकरणात ठेकेदारांकडून रक्कम स्वीकारण्यात आल्याचा आरोप असून, संबंधित कागदपत्रे बनावट असल्याचे लक्षात आल्यानंतर संपूर्ण प्रकार उघडकीस आला.
या प्रकरणी नाशिक रोड पोलीस ठाण्यात गुन्हा दाखल करण्यात आला असून, पोलिसांनी आतापर्यंत दोघांना अटक केल्याची माहिती आहे. दरम्यान, या प्रकरणाच्या तपासात जामनेरमधील आणखी काही व्यक्तींच्या भूमिकेबाबत चौकशी सुरू असल्याची चर्चा आहे. यामध्ये जामनेर नगरपालिकेशी संबंधित एका व्यक्तीसह झेरॉक्स व्यवसायाशी संबंधित व्यक्तीचे नाव चर्चेत असल्याचे सांगितले जात आहे. मात्र, या दोघांची नेमकी भूमिका काय आहे, याबाबत अधिकृत तपासातूनच स्पष्टता येणार आहे.
कागदपत्रातील चुकीमुळे बनावट ऑर्डरचा भांडाफोड?
या प्रकरणातील एका ऑर्डरमध्ये नाशिक विभागाचे महसूल आयुक्त प्रवीण गेडाम यांच्या नावाच्या स्पेलिंगमध्ये चूक आढळल्याने संशय निर्माण झाल्याची माहिती समोर येत आहे. संबंधित कंत्राटदाराच्या निदर्शनास ही बाब आल्यानंतर त्याने पोलिसांना माहिती दिल्याचे सांगितले जाते. त्यानंतर कागदपत्रांची पडताळणी करताना बनावट ऑर्डरचा प्रकार उघडकीस आल्याचे समोर आले आहे.
जामनेरमधील कनेक्शनची चर्चा
या प्रकरणाचा तपास पुढे सरकत असताना जामनेरमधील दोन व्यक्तींच्या भूमिकेबाबत चर्चा सुरू झाली आहे. त्यापैकी एकाचा नगरपालिका परिसराशी, तर दुसऱ्याचा झेरॉक्स व्यवसायाशी संबंध असल्याचे सांगितले जात आहे. मात्र, पोलिसांनी अद्याप या व्यक्तींविरुद्ध कोणती कारवाई केली आहे किंवा त्यांना आरोपी म्हणून घोषित केले आहे का, याबाबत अधिकृत माहिती स्पष्ट झालेली नाही.
दरम्यान, या प्रकरणातील एका व्यक्तीचे जामनेरशी वास्तव्य असून तो धुळे येथे शिक्षक असल्याची माहितीही चर्चेत आहे. यापूर्वीही संबंधित व्यक्तीच्या नावामुळे राजकीय पातळीवर वाद निर्माण झाल्याचे सांगितले जात आहे. मात्र, त्याचा सद्य बनावट ऑर्डर प्रकरणातील सहभाग तपासातून सिद्ध होणे बाकी आहे.
राजकीय कनेक्शनच्या चर्चेला उधाण
प्रकरणातील काही संशयितांचे राजकीय संबंध असल्याची चर्चा सुरू झाल्याने या प्रकरणाला राजकीय रंगही चढला आहे. मात्र, केवळ नातेवाईक अथवा राजकीय संबंधांच्या आधारे कोणाची गुन्ह्यातील भूमिका निश्चित करता येणार नाही. पोलिस तपासातून संबंधित व्यक्तींची भूमिका स्पष्ट झाल्यानंतरच या प्रकरणातील खरे सूत्रधार कोण, हे समोर येणार आहे.
सुमारे 500 ते 600 कोटी रुपयांच्या कथित बनावट ऑर्डरचा हा प्रकार असल्याने पोलिस तपासाची व्याप्ती वाढण्याची शक्यता आहे. आतापर्यंत झालेल्या अटकेनंतर तपासाची दिशा आता जामनेरकडे वळल्याची चर्चा असून, या प्रकरणात आणखी कोणाची नावे समोर येतात आणि कोणावर कारवाई होते, याकडे लक्ष लागले आहे.