जळगाव : शहरातील अजिंठा चौफुलीजवळ अज्ञात वाहनाने दिलेल्या धडकेत दुचाकीस्वार तरुणाचा जागीच मृत्यू झाला. ही घटना रविवार (दि.25) मध्यरात्री दीड वाजेच्या सुमारास घडली. मृताचे नाव प्रेम धीरज ठाकूर (वय 20, रा. शिंदे नगर, जळगाव) असे आहे. याप्रकरणी एमआयडीसी पोलीस ठाण्यात अकस्मात मृत्यूची नोंद करण्यात आली आहे.
प्रेम ठाकूर हा शिंदे नगर येथे आपल्या कुटुंबासमवेत राहत होता. टूर ॲण्ड ट्रॅव्हल्स व्यवसायातून तो उदरनिर्वाह करत होता. रविवार (दि.25) मध्यरात्री दीडच्या सुमारास तो दुचाकीवरून अजिंठा चौकाकडे जात असताना अज्ञात वाहनाने समोरून जोरदार धडक दिली. अपघातात त्याचा जागीच मृत्यू झाला. अपघातानंतर एमआयडीसी पोलिसांनी घटनास्थळी धाव घेऊन पंचनामा केला. मृतदेह जिल्हा शासकीय रुग्णालयात हलविण्यात आला असून पुढील तपास सुरू आहे.