जळगाव : शासकीय कामासाठी थेट लाचेची मागणी करणाऱ्या जळगाव जिल्ह्यातील मुक्ताईनगर तालुक्यातील काकोडा ग्रामपंचायतीचे सरपंच तुळशीराम कांबळे आणि ग्रामपंचायत शिपाई आत्माराम मेहनकार यांच्यावर लाचलुचपत प्रतिबंधक विभागाने मंगळवारी (९ डिसेंबर) मोठी कारवाई केली आहे. या दोघांविरुद्ध भ्रष्टाचार प्रतिबंधक कायद्यान्वये गुन्हा दाखल करण्यात आला आहे.
काकोडा गावचे रहिवासी असलेले तक्रारदार हे त्यांच्या रिकाम्या जागेवर शासनाच्या घरकुल योजनेतून घर बांधू इच्छित होते. त्यासाठी त्यांना ग्रामसेवकाच्या सहीने आवश्यक असलेला 'नमुना नंबर ८' चा उतारा हवा होता. तक्रारदारांनी सरपंच तुळशीराम कांबळे यांची भेट घेतली असता, सरपंचांनी त्यांना उतारा काढून दिला. मात्र, या कामाच्या मोबदल्यात सरपंचांनी तक्रारदाराकडे थेट पाच हजार रुपये लाचेची मागणी केली.
लाच देण्याची इच्छा नसल्यामुळे तक्रारदाराने ७ नोव्हेंबर २०२४ रोजी जळगाव येथील लाचलुचपत प्रतिबंधक विभागाकडे तक्रार नोंदवली. एसीबीच्या पथकाने तक्रारीची पडताळणी केली असता, ग्रामपंचायत शिपाई आत्माराम मेहनकार याने तक्रारदाराकडे पंचांसमक्ष तीन हजार रुपयांची लाच मागितल्याचे निष्पन्न झाले. विशेष म्हणजे, या लाच मागणीसाठी सरपंच तुळशीराम कांबळे यांनीच शिपाई मेहनकार याला प्रोत्साहन दिल्याचेही पडताळणीत स्पष्ट झाले.
लाचेची मागणी सिद्ध झाल्यानंतर एसीबीच्या पथकाने तातडीने कारवाई करत, सरपंच तुळशीराम कांबळे आणि शिपाई आत्माराम मेहनकार या दोघांविरुद्ध मुक्ताईनगर पोलीस ठाण्यात भ्रष्टाचाराचा गुन्हा दाखल केला आहे. एसीबीचे पथक या प्रकरणाचा पुढील तपास करत आहे.