जळगाव : शेतातील झोपडीत विवाहितेने घेतला गळफास; फैजपूर येथील घटना

जळगाव : यावल तालुक्यातील फैजपूर येथे रावेर रस्त्यावर असलेल्या एका गॅरेजच्या मागील शेतात झोपडीमध्ये 38 वर्षीय विवाहितेने गळफास घेतला. हा प्रकार गुरूवारी (दि.19) रोजी निदर्शनास आल्यानंतर तातडीने विवाहितेला यावल ग्रामीण रुग्णालयामध्ये आणण्यात आले. डॉक्टरांनी तपासणी करून तिला मृत घोषित केले. याप्रकरणी फैजपूर पोलीस ठाण्यात अकस्मात मृत्यूची नोंद करण्यात आली आहे.

फैजपूर शहरातून रावेरकडे जाणाऱ्या रस्त्यावर शहराबाहेर असणाऱ्या गॅरेजच्या मागे असलेल्या शेतात झोपडी आहे. या झोपडीत गीता प्रताप बारेला (वय ३८) ही विवाहिता कुटुंबासह राहते. गुरूवारी (दि.19) विवाहितेने गळफास घेतल्याचे निदर्शनास आल्यावर फैजपूर पोलिसांना माहिती देण्यात आली. घटनास्थळी सहायक पोलिस निरिक्षक रामेश्वर मोताळे यांच्या मार्गदर्शनाखाली हवालदार अमजद खान पठाण, ज्ञानेश्वर चौधरी यांनी विवाहितेस तातडीने यावल ग्रामीण रुग्णालयामध्ये दाखल केले. वैद्यकिय अधिकारी डॉ.तुशार सोनवणे यांनी विवाहितेची तपासणी करून तिला मृत घोषित केले. याप्रकरणी प्रताप बारेला यांच्या फीर्यादीवरुन फैजपूर पोलिसात अकस्मात मृत्यूची नोंद करण्यात आली आहे. पुढील तपास हवालदार अनिल पाटील करीत आहेत. मयत महिलेच्या पश्चात पती, तीन मुले, दोन मुली असा परिवार आहे. ती मध्यप्रदेशातील बऱ्हाणपुर तालुक्यातील भोलाणे येथील मुळची रहिवासी असुन पतीसह शेतात काम करून उदरनिर्वाह करीत होती.