जळगाव : वरणगाव शहरातील सराईत गुन्हेगार गावठी कट्टा घेऊन परिसरात दहशत निर्माण करत असल्याची गोपनीय माहिती मिळाल्यानंतर स्थानिक गुन्हे शाखेच्या (LCB) पथकाने धाड टाकून एका आरोपीला ताब्यात घेतले. त्याच्याकडून दोन गावठी कट्टे आणि एक जिवंत काडतूस असा एकूण ५० हजार ५०० रुपयांचा मुद्देमाल जप्त करण्यात आला आहे.
पोलिस अधीक्षक डॉ. महेश्वर रेड्डी यांनी आगामी सण-उत्सव आणि स्थानिक स्वराज्य संस्था निवडणुका लक्षात घेता, अवैधरित्या शस्त्र बाळगणाऱ्यांवर कठोर कारवाईचे आदेश दिले होते. त्यानुसार स्थानिक गुन्हे शाखेचे वरिष्ठ पोलिस निरीक्षक राहुल गायकवाड यांना माहिती मिळाली की, वरणगाव येथील रेकॉर्डवरील आरोपी संजय चंडेले (रा. वरणगाव, ऑर्डनन्स फॅक्टरी) हा विनापरवाना शस्त्र बाळगून फिरत असून नागरिकांमध्ये दहशत निर्माण करत आहे.
मिळालेल्या माहितीच्या आधारे वरणगाव शहरातील तिरंगा चौक परिसरात सापळा रचण्यात आला. आरोपी संजय चंडेले याला घटनास्थळी पकडण्यात आले. त्याच्या अंगझडतीत दोन गावठी पिस्तुल आणि एक जिवंत काडतूस मिळून आले आहे. एकूण मुद्देमालाची किंमत ५० हजार ५०० रुपये असून या प्रकरणी वरणगाव पोलिस ठाण्यात भारतीय शस्त्र अधिनियम कलम ३/२५ अंतर्गत गुन्हा नोंद करण्यात आला आहे. आरोपी संजय चंडेले याच्यावर यापूर्वीही शस्त्र कायद्यानुसार गुन्हे दाखल आहेत.
पोलिस अधीक्षक डॉ. महेश्वर रेड्डी, अपर पोलिस अधीक्षक अशोक नखाते आणि स्थानिक गुन्हे शाखेचे वरिष्ठ पोलिस निरीक्षक राहुल गायकवाड यांच्या मार्गदर्शनाखाली पोलीस उपनिरीक्षक शरद बागल, रवी नरवाडे, गोपाळ गव्हाळे, उमाकांत पाटील, विकास सातदीवे, श्रीकृष्ण देशमुख, प्रशांत परदेशी, राहुल वानखेडे आणि भारत पाटील यांनी ही कारवाई पार पाडली.