राहुरी : राहुरी तालुक्यातील डिग्रस फाटा येथे रस्त्यावरील खड्ड्यांमुळे एका 50 वर्षीय महिलेचा अपघाती मृत्यू झाल्याची घटना घडली. संबधित महिलेचा अंत्यविधी झाल्यानंतर संतप्त नातेवाईकांनी राहुरीत नगर-मनमाड महामार्गावर अचानकपणे चक्काजाम आंदोलन करून संबंधित ठेकेदारावर गुन्हा दाखल करण्यासाठी रास्ता रोको आंदोलन केले.
या घटनेतील सुभद्रा साहेबराव जगधने (वय 50, रा. लक्ष्मीनगर, राहुरी) ह्या दि. 29 ऑगस्ट 2025 रोजी सायंकाळी 7 वाजेच्या सुमारास नगरहून राहुरीकडे येत होत्या. दरम्यान राहुरी तालुक्यातील डिग्रस फाटा परिसरात नगर-मनमाड राज्य महामार्गावर असलेल्या खड्ड्यामुळे झालेल्या अपघातात सुभद्रा जगधने यांचा जबर मार लागल्याने मृत्यू झाला. शनिवार दि. 30 ऑगस्ट रोजी सायंकाळी 5 वाजे दरम्यान मयत सुभद्रा जगधने यांच्या मृतदेहावर शहरातील गणपती घाट येथे अंत्यसंस्कार करण्यात आले. त्यानंतर संतप्त झालेल्या नातेवाईकांनी अचानक नगर-मनमाड राज्य महामार्गावर जिजाऊ चौक येथे मोठ्या संख्येने जमा होऊन रस्ता रोको आंदोलन केले. (Ahilyanagar News)
या प्रसंगी नंदुभाऊ शिंदे, कांतिलाल जगधने, ज्ञानेश्वर जगधने, सुर्यकांत वाकचौरे, सिंधुबाई जगधने आदिंनी आपले मनोगत व्यक्त करुन संताप व्यक्त केला. तसेच संबंधित ठेकेदारावर सदोष मनुष्य वधाचा गुन्हा दाखल होत नाही, तोपर्यंत आम्ही आंदोलन सुरुच ठेवणार असा पवित्रा आंदोलनकर्त्यांनी घेतला.
सुमारे अर्धा तास अचानक झालेल्या रस्तारोको आंदोलनाने राज्य महामार्गावर वाहनांच्या मोठ्या रांगा लागल्याने पोलिस प्रशासनामध्ये चांगलीच धावपळ उडाली होती. पोलिस प्रशासनाकडून गुन्हा दाखल करण्याचे आश्वासन दिल्यानंतर आंदोलनकर्त्यांनी माघार घेत रस्ता मोकळा करून दिला.
या प्रसंगी माजी नगरसेवक सोन्याबापू जगधने, गंगा उंडे, एकनाथ जगधने, भीमराज जगधने, रवींद्र जगधने, राहुल जगधने, सचिन जगधने, संतोष जगधने, निलेश पाखरे, दत्तात्रय जोगदंड, दीपक बलसने, मुकेश जगधने, वसंत लाहुंडे, जयंत जगधने, निलेश जगधने, आकाश जगधने, आनंद जोगदंड, सचिन जोगदंड, आदित्य जगधने, अमोल जगधने आदिसह शेकडो महिला पुरुष उपस्थित होते.