Shirdi News: श्रीसाईबाबा संस्थान विश्वस्त व्यवस्थेच्यावतीने नाताळ सुट्टीसह या वर्षाला निरोप व नव वर्षाच्या स्वागतानिमित्त शिर्डी महोत्सव आयोजित केला आहे. सद्गुरु श्रीसाईबाबांच्या दर्शनासाठी शिर्डीत होणारी संभाव्य गर्दी लक्षात घेता, समाधी मंदिर मंगळवार (दि. 31 डिसेंबर) रोजी दर्शनासाठी रात्रभर खुले ठेवण्यात येणार आहे, अशी माहिती संस्थानचे प्र. मुख्य कार्यकारी अधिकारी बाळासाहेब कोळेकर यांनी दिली.
कोळेकर म्हणाले की, दरवर्षी नाताळ सुट्टी, चालु वर्षाला निरोप व नवीन वर्षाच्या स्वागतानिमित्त श्रींच्या दर्शनासाठी शिर्डीत मोठ्या प्रमाणात भाविक येतात. भाविकांना श्रींच्या समाधीच्या दर्शनाचा लाभ मिळावा, गर्दीचे नियोजन योग्य व्हावे, या उद्देशाने 31 डिसेंबर रोजी श्रींचे समाधी मंदिर दर्शनासाठी रात्रभर खुले ठेवण्यात येणार आहे. यामुळे 31 डिसेंबरची शेजारती व 1 जानेवारी 2025 रोजीची पहाटेची काकड आरती होणार नाही, असे त्यांनी सांगितले.
शिर्डी महोत्सव यशस्वीतेसाठी संस्थानचे प्र. मुख्य कार्यकारी अधिकारी बाळासाहेब कोळेकर यांच्या मार्गदर्शनाखाली संस्थानचे प्र. उप मुख्य कार्यकारी अधिकारी, प्रशासकीय अधिकारी विभागांचे विभाग प्रमुख व कर्मचारी प्रयत्नशील आहेत.
‘नाताळ सणासह नवर्षाच्या सुट्टीच्या गर्दीमुळे बुधवार (दि. 25 ते बुधवार दि. 1 जानेवारी 2025) असे 7 दिवस वाहन पूजा बंद राहतील, परंतू नाताळ सुट्टीच्या कालावधीत श्रीसाईसत्यव्रत पूजा व अभिषेक पूजा सुरु राहील, असे सांगत, कोळेकर म्हणाले की, श्रीसाईबाबा मंदिर परिसरात फटाके व वाद्य वाजविण्यास मनाई करण्यात आली आहे. सुरक्षिततेच्या दृष्टीने शिस्तीचे पालन करावे.- बाळासाहेब कोळेकर, श्रीसाईबाबा संस्थानचे प्र. मुख्य कार्यकारी अधिकारी, शिर्डी.