वांबोरी : पुणे जिल्ह्यातून आलेल्या प्रेमीयुगुलापैकी प्रेयसीने पैसे मागितल्याच्या रागातून प्रियकराने कोयत्याने वार करून तिचे शीर धडावेगळे केले. वांबोरी परिसरातील (ता. राहुरी) विळद रोडवरील पिलेश्वर देवस्थान परिसरात असलेल्या गणपती मंदिरात जवळ बुधवारी (दि. 19) ही घटना घडली. सोनाली राजू जाधव (वय 28, रा. पोखरी, ता. आंबेगाव, जि. पुणे) असे मृत महिलेचे नाव आहे. खून केल्यानंतर आरोपी सखाराम धोंडिबा वालकोळी (वय 58, रा. निडगुरसर, ता. आंबेगाव, जि. पुणे) याने स्वतःहून पोलिसात दाखल होत खुनाची माहिती दिली.
याबाबत पोलिस हेडकॉन्स्टेबल सुनील निकम यांच्या फिर्यादीवरून राहुरी पोलिस ठाण्यात गुन्हा दाखल झाला आहे. फिर्यादीत म्हटल्यानुसार आरोपी सखाराम हा प्रेयसी सोनालीसोबत बुधवारी (दि. 19) सायंकाळी सातच्या सुमारास वांबोरी परिसरातील पिलेश्वर देवस्थान मंदिर परिसरात आला. दरम्यान, प्रेयसी सोनाली सखारामकडे पैशाची मागणी करू लागली. ‘मला पैसे दे नाहीतर मी पोलिसात तक्रार करीन,’ असे ती म्हणाली. त्यावरून सोनाली व सखाराम यांच्यात वाद झाले. त्यानंतर सखाराम याने सोनालीच्या मानेवर कोयत्याने वार करून तिचा निर्घृण खून केला.
कोयत्याचा वार इतका जोरात होता, की सोनालीचे शीर धडावेगळे झाले. त्यानंतर आरोपी सखाराम खून केलेला कोयता घेऊन सुमारे चार किलोमीटर अंतर चालत रात्री दहाच्या सुमारास वांबोरी पोलिस दूरुक्षेत्रात दाखल झाला. तेथे त्याने फोन स्वतःच फोन करून पोलिसांना बोलावून घेतले. ‘मी माझी प्रेयसी सोनालीला ठार मारले आहे,’ असे त्याने सांगितले. दरम्यान, पोलिसांनी सोनालीचा मृतदेह पहाटे तीनच्या सुमारास वांबोरी ग्रामीण रुग्णालयात आणला. तेथून उत्तरीय तपासणीसाठी जिल्हा रुग्णालयात पाठवण्यात आला. पोलिस निरीक्षक संजय ठेंगे यांच्या मार्गदर्शनाखाली पोलिस उपनिरीक्षक चारुदत्त खोंडे तपास करत आहेत.