नगर: अहिल्यानगर शहरातील शनी चौक परिसरातील गुजर गल्लीमध्ये सलग दुसऱ्या दिवशी वाहनांना आग लावल्याचा प्रकारसमोर आला आहे. काल मध्यरात्री गौरव विनायक कुलकर्णी यांच्या घरासमोर उभ्या असलेल्या दोन आलिशान मोटारकारला आग लावून जाळण्यात आल्या. या घटनेची धग कायम असतानाच आज पुन्हा त्यांच्या दुचाकीला आग लावण्याचा प्रयत्न झाल्याने हा प्रकार अपघाती नसून पूर्वनियोजित घातपाताचा कट असल्याचा संशय बळावला आहे. या प्रकारामुळे नागरिकांमध्ये भीतीचे वातावरण निर्माण झाले आहे.
अधिक माहिती अशी, शहरातील गुजर गल्ली येथे गुरूवारी रात्री मध्यरात्री गौरव कुलकर्णी यांच्या घरासमोर पार्क केलेल्या अलिशान चारचाकी वाहनांना आग लावण्यात आली. त्यात दोन्ही वाहने जळून खाक झाली. या घटनेमुळे परिसरात मोठी खळबळ उडाली होती. दरम्यान, शुक्रवारी पुन्हा मध्यरात्री त्यांच्या दुचाकीला आग लावण्याचा प्रयत्न झाल्याचे समोर आले आहे.
या सलग घडणाऱ्या घटनांमुळे कुलकर्णी कुटुंबीयांसह संपूर्ण परिसरात भीती आणि असुरक्षिततेचे वातावरण निर्माण झाले आहे. या घटनेचे सीसीटीव्ही फुटेज समोर आले असून, तीन संशयितांच्या हालचाली वाहनाजवळ स्पष्टपणे दिसून येत आहेत. त्यामुळे हा प्रकार नियोजनबद्ध कटाचा भाग असल्याची चर्चा नागरिकांमध्ये सुरू आहे.
या घटनेची गंभीर दखल घेत आमदार संग्राम जगताप यांनी तातडीने घटनास्थळी भेट देऊन परिस्थितीची पाहणी केली. दरम्यान, प्रकरणाचा तपास पोलिस निरीक्षक संभाजी गायकवाड यांच्या मार्गदर्शनाखाली सुरू आहे. परिसरातील सर्व सीसीटीव्ही फुटेजची तपासणी करण्यात येत असून आरोपींच्या हालचालींचा मागोवा घेतला जात आहे.
आरोपींना तत्काळ अटक करा: जगताप
अशा प्रकारच्या घटना घडविणाऱ्या समाजविघातक प्रवृत्तीला वेळीच ठेचले पाहिजे. नागरिकांच्या जीवित आणि मालमत्तेच्या सुरक्षेचा प्रश्न अत्यंत गंभीर आहे. अशा घटना पुन्हा घडू नयेत यासाठी पोलिस प्रशासनाने अधिक सतर्क राहणे गरजेचे आहे. सीसीटीव्ही फुटेजमध्ये दिसणाऱ्या संशयित आरोपींचा तात्काळ शोध घेऊन त्यांना अटक करावी, अशी मागणी आमदार संग्राम जगताप यांनी केली.