Loha Nagar Parishad Election Result 2025: नांदेड जिल्ह्यातील लोहा नगरपरिषद निवडणुकीने मोठा मेसेज दिला आहे. एकाच कुटुंबातील तब्बल सहा उमेदवारांना उमेदवारी देणाऱ्या भाजपाला मतदारांनी जोरदार झटका दिला असून, या सर्व उमेदवारांचा पराभव झाला आहे. या निकालामुळे “घराणेशाहीला जनता थारा देत नाही” हे पुन्हा एकदा अधोरेखित झालं आहे.
या निवडणुकीत भाजपने नगराध्यक्षपदासाठी गजानन सूर्यवंशी यांना मैदानात उतरवलं होतं. याशिवाय त्यांच्या पत्नी, भाऊ, भावजय, मेव्हुणा आणि नातेवाईक अशा एकाच कुटुंबातील सहा जणांना विविध प्रभागांतून उमेदवारी देण्यात आली होती. या निर्णयामुळे प्रचाराच्या काळातच शहरात जोरदार चर्चा रंगली होती. अखेर मतमोजणीच्या दिवशी जनतेने भाजपच्या या प्रयोगाला स्पष्ट नकार दिला.
लोहा नगरपरिषद निवडणूक ही भाजप, राष्ट्रवादी आणि काँग्रेस यांच्यातील तिरंगी लढत म्हणून पाहिली जात होती. राष्ट्रवादी अजित पवार गटाने नगराध्यक्षपदाची बाजी मारत भाजपचा पराभव केला. एकूण दहा प्रभाग आणि 20 नगरसेवक असलेल्या या नगरपरिषदेत भाजपने सर्व जागा लढवूनही अपेक्षित यश मिळवू शकले नाही.
या निकालाकडे राजकीय दृष्टिकोनातून पाहिलं असता, भाजपसाठी ही निवडणूक अधिकच अडचणीची ठरली आहे. कारण नांदेड जिल्ह्यात भाजपची जबाबदारी माजी मुख्यमंत्री अशोक चव्हाण यांच्या नेतृत्वाखाली होती. इच्छुक उमेदवार मोठ्या संख्येने असतानाही एका कुटुंबावर विश्वास ठेवण्याचा निर्णय भाजपला महागात पडल्याचं चित्र आहे.
एकीकडे भाजपकडून काँग्रेसवर सातत्याने घराणेशाहीचे आरोप केले जात असताना, दुसरीकडे लोह्यातील उमेदवारी निर्णयामुळे पक्षच अडचणीत आला. निकालानंतर राजकीय वर्तुळात “जनतेने केवळ उमेदवार नाही, तर विचारसरणीला मत दिलं” अशी चर्चा सुरू आहे.
लोहा नगरपरिषद निवडणुकीचा निकाल हा केवळ स्थानिक राजकारणापुरता मर्यादित न राहता, आगामी काळात जिल्हा आणि राज्य पातळीवरील राजकीय समीकरणांवरही परिणाम करणारा ठरण्याची शक्यता वर्तवली जात आहे.