पनवेल : पुढारी वृत्तसेवा : सायन-पनवेल महामार्गावर रविवारी घडलेल्या दोन विचित्र अपघातांमध्ये एक ठार तर, सहा जखमी झाले आहेत. कामोठे आणि खारघर येथे या घटना घडल्या. या अपघातांमुळे महामार्गावर वाहतूक कोंडी झाली होती. रविवारी सकाळी 8 च्या दरम्यान कामोठे उड्डाणपुलावर मुंबईच्या दिशेने जाणार्या लेनवर एक विचित्र अपघात घडला.
पाच गाड्या एकमेकांवर आदळल्या. यामध्ये एकाचा मृत्यू झाला. तर सहा प्रवाशी जखमी झाले आहेत. कामोठे उड्डाणपुलावर मुबईच्या दिशेने जाणार्या लेनवर सकाळी ट्रक बंद पडला होता. या ट्रकचे काम सुरू होते. त्याचवेळी मागून भरधाव आलेल्या व्हॅगनआर कार, इनोवा, एक ट्रक आणि एसटी महामंडळाची शिवनेरी बस एकमेकांवर आदळल्या.
यात व्हॅगनआरमधील एकाचा मृत्यू झाला. यातील इतर सहप्रवासी व इनोव्हामधील प्रवासी असे जवळपास सहा जण जखमी झाले आहेत. त्यांच्यावर एमजीएम रुग्णालयात उपचार सुरु आहे. या घटनेपाठोपाठ खारघर उड्डाणपुलावर देखील एका कंटेनरला एर्टीगा गाडी धडकून विचित्र अपघात घडला. या अपघातामुळे सायन-पनवेल महामार्गावर वाहतूक कोंडी झाली होती.