मुंबई, पुढारी वृत्तसेवा : भारतीय जनता पार्टीचे प्रदेश अध्यक्ष चंद्रशेखर बावनकुळे यांनी तीन महत्त्वपूर्ण समित्यांची घोषणा आज (दि.२८) केली आहे. प्रदेश संघटनपर्व समिती चे प्रदेश प्रभारी म्हणून माजी मंत्री रवींद्र चव्हाण (Ravindra Chavan) यांच्या नावाची घोषणा करण्यात आली आहे. तर भाजपच्या संघटनात्मक बांधणीच्या नियोजनाची जबाबदारी रवींद्र चव्हाण यांच्याकडे सोपविण्यात आली आहे.
महाराष्ट्रात 21 डिसेंबरपासून संघटनपर्व सुरू करण्यात आले आहे. या पर्वाची सुरुवात नागपूर येथून कऱण्यात आली. प्रदेश अनुशासन समितीच्या अध्यक्षपदी माजी आमदार प्रा. अनिल सोले यांची नियुक्ती करण्यात आली आहे. या समितीत छ.संभाजीनगरचे किशोर शितोळे, माजी केंद्रीय राज्यमंत्री डॉ. भारती पवार, मुंबईचे माजी आमदार अतुल शाह व पुणे येथील योगेश गोगावले यांना सदस्य म्हणून नियुक्त केले आहे.
प्रदेश सक्रिय सदस्यता अभियानाची घोषणा केली आहे. अभियानाचे प्रमुखपदी प्रदेश सरचिटणीस राजेश पांडे (पुणे) व बीड येथील प्रवीण घुगे यांची अभियान सहप्रमुख म्हणून नियुक्ती करण्यात आली आहे. या तीनही समित्यांच्या प्रमुखांची पत्रे बावनकुळे यांनी जारी केली आहेत.