मुंबई : पुण्यातील प्रसिद्ध दगडूशेठ हलवाई गणपती मंदिरास ‘अ’ वर्ग पर्यटन स्थळाचा दर्जा देण्यात आला आहे. मंगळवारी राज्य सरकारने हा निर्णय जारी केला. दरम्यान, तीन वर्षांपूर्वी दगडूशेठ गणपती मंदिराचा ‘क’ वर्ग पर्यटन स्थळांच्या यादीत समावेश करण्यात आला होता. मात्र, पुण्यातील ऐतिहासिक स्थळांच्या जवळ असणारे हे मंदिर धार्मिक व सांस्कृतिक पर्यटन साखळीतील महत्त्वाचा भाग असून, ‘अ’ वर्ग स्थळांच्या निकषात बसते. त्यामुळे मंदिराचा ‘अ’ वर्ग पर्यटन स्थळांच्या यादीत समावेश करण्यात येत असल्याचे जाहीर करण्यात आले आहे.
1893 साली स्थापित झालेले हे मंदिर पुण्याच्या इतिहास, श्रद्धा, संस्कृती आणि समाजसेवेचे प्रतीक आहे. धार्मिक भक्ती, सामाजिक एकोपा, सांस्कृतिक वारसा आणि पर्यटन विकास यांचा संगम या स्थळामध्ये आहे. पुणे शहरातील प्रसिद्ध आणि सांस्कृतिकदृष्ट्या महत्त्वाचे असे हे स्थान महाराष्ट्राच्या धार्मिक, सामाजिक आणि पर्यटन परंपरेचे प्रतीक बनल्याचे पर्यटन विभागाने आपल्या निर्णयात नमूद केले आहे.
हे मंदिर पुण्यातील प्रमुख पर्यटन आकर्षणांपैकी एक असून, देश-विदेशातील पर्यटक पुणे भेटीदरम्यान येथे दर्शनासाठी येतात. मंदिराचे भव्य स्थापत्य, सुवर्णमंडित मूर्ती, आकर्षक प्रकाशयोजना आणि उत्सवकाळात पर्यटकांना विशेष आकर्षित करते. राज्यातील पर्यटन स्थळांची निवड व त्यांना ‘अ’ वर्ग पर्यटन स्थळ म्हणून घोषित करण्याबाबतचे निकष ठरविण्यात आले. या निकषांची पूर्तता होत असल्याने श्रीमंत दगडूशेठ हलवाई गणपती, पुणे या स्थळास ‘अ’ वर्ग पर्यटन स्थळाचा दर्जा देण्यात आला.