मुंबई : पुढारी वृत्तसेवा : विमानाने प्रवास करण्यापूर्वी प्रवाशांना सामान नेण्याबाबत दक्ष राहावे लागणार आहे. हवाई वाहतूक मंत्रालयाने हँडबॅगसाठी नवीन नियम जारी केले आहेत. या अंतर्गत प्रत्येक विमानामध्ये प्रवासी फक्त एकच हॅण्डबॅग घेऊन जाऊ शकतील.
या अगोदर प्रवासी ७ किलो वजनाला दोन हॅण्डबॅगमध्ये विभागून घेऊ जाऊ शकत होते. त्यावर आता निर्बंध घातले गेले आहेत, नव्या नियमांनुसार केवळ एकच बॅग तुम्ही हातात घेऊन जाऊ शकता. ब्युरो ऑफ सिव्हिल एव्हिएशन सिक्युरिटी आणि केंद्रीय औद्योगिक सुरक्षा दल (सीआयएसएफ) ने सुरक्षा व्यवस्था सुव्यवस्थित करण्यासाठी नवीन हँड बॅगेज नियम आणले आहेत. इकॉनॉमी आणि प्रीमियम इकॉनॉमी क्लासमधील प्रवाशांसाठी ७ किलोपर्यंतच्या हँडबॅगला परवानगी आहे आणि प्रथम श्रेणी आणि बिझनेस क्लासमधील प्रवाशांसाठी १० किलोपर्यंतच्या हँडबॅगला परवानगी आहे. सामानाचा आकार ४० सेमी (लांबी), २० सेमी (रुंदी) आणि ५५ सेमी (उंची) पेक्षा जास्त नसावा.
नोव्हेंबरमध्ये देशांतर्गत १.४२ कोटी प्रवाशांनी हवाई वाहतूक केली आहे. गेल्यावर्षी याच महिन्याच्या तुलनेत ही १२ टक्क्यांची वाढ आहे. जानेवारी- नोव्हेंबर २०२४ या कालावधीत देशांतर्गत विमान कंपन्यांद्वारे प्रवासी वाहतूक करणाऱ्यांची संख्या १,४६४.० २लाख होती, जी मागील वर्षी याच कालावधीत १,३८२.३४ लाख होती, ज्यात वार्षिक ५.९१ टक्के आणि ११.९ टक्के मासिक वाढ नोंदवली गेली.