नेरूळ : कॅबमधून प्रवास करणाऱ्या महिला प्रवाशासमोरच चालकाने अश्लील कृत्य केल्याची घटना १० नोव्हेंबर रोजी रात्री १० च्या सुमारास घडली. वाशी ते नवीन पनवेल असा प्रवास सुरू असताना चालकाने गाडी चालवत असतानाच आपले गुप्तांग बाहेर काढून अश्लील चाळे केल्याचा आरोप आहे. महिलेने प्रसंगावधान राखत चालकाला विरोध केला. या तक्रारीनंतर नेरुळ पोलिसांनी चालकाविरोधात विनयभंगाचा गुन्हा दाखल करत ताब्यात घेतले आहे.
पीडित महिला आपल्या आई-वडिलांसह रॅपिडो कॅबने वाशी येथून नवीन पनवेलला जात होती. कॅबमध्ये महिला पुढील सीटवर, तर तिचे आई-वडील मागील सीटवर बसले होते. सायन-पनवेल महामार्गावर नेरुळ येथील रहेजा कन्स्ट्रक्शनसमोर कॅब आली असता,चालकाने गाडी चालवत असतानाच गुप्तांग बाहेर काढून अश्लील कृत्य करण्यास सुरुवात केल्याचा आरोप महिलेने केला आहे.
हा प्रकार लक्षात येताच महिलेने चालकाला जाब विचारत त्याला विरोध केला. त्यानंतर चालकाने आपले कृत्य थांबवले. महिलेने संबंधित चालकाला खांदेश्वर पोलीस ठाण्यात नेले. मात्र, तेथून तिला नेरुळ पोलीस ठाण्यात तक्रार देण्यासाठी पाठवण्यात आले.