मुंबई : सीएसएमटी टर्मिनसमधून २४ डब्यांच्या मेल-एक्स्प्रेस चालविण्यासाठी प्लॅटफॉर्म क्रमांक १२ आणि १३ चा विस्तार करण्याचे काम मध्य रेल्वेने हाती घेतले आहे. त्यामुळे मुंबईत येणाऱ्या आणि जाणाऱ्या ९ मेल-एक्स्प्रेस ३१ डिसेंबरपर्यंत सीएसएमटी स्थानकापर्यंत न चालविता दादर स्थानकापर्यंत चालविण्यात येणार आहे.
वेगवान आणि किफायतशीर दरामुळे रेल्वेच्या लांब पल्ल्याच्या मेल-एक्स्प्रेसची प्रवासी संख्या दिवसागणिक वाढते आहे. वाढत्या प्रवासीसंख्येमुळे गाड्यांची वेटिंग लिस्ट वाढत आहे. त्यामुळे प्रवाशांना आरक्षित तिकीट मिळत नाही. परिणामी, रेल्वे बोर्डाने प्रवासी गर्दी विभागण्यासाठी मेल-एक्स्प्रेसचे डबे वाढविण्याचा निर्णय घेतला आहे. त्यासाठी देशातील क्षेत्रीय रेल्वेला जास्तीत जास्त २४ डब्यांच्या मेल-एक्स्प्रेस चालविण्याचे आदेश दिले आहेत. त्यानुसार मध्य रेल्वेने सीएसएमटी स्थानकातील प्लॅटफॉर्मच्या विस्तारीकरणाचे काम हाती घेतले आहे. प्लॅटफॉर्म क्रमांक १२-१३ ची लांबी वाढवण्याचे काम सुरू करण्यात आले आहे. हे काम पूर्ण झाल्यावर २४ डब्यांच्या गाड्या चालवण्यासाठी सीएसएमटीमध्ये चार प्लॅटफॉर्म उपलब्ध होतील.
२२१२० मडगाव-सीएसएमटी तेजस एक्स्प्रेस, १२०५२ मडगाव-मुंबई जनशताब्दी, १२८१० हावडा-सीएसएमटी, ११४०२ अदिलाबाद-मुंबई नंदीग्राम, १२११२ अमरावती-सीएसएमटी, २२१०८ लातूर सीएसएमटी आणि २२१४४ बिदर-सीएसएमटी, ११०२० भुनवनेश्वर-सीएसएमटी यांचा प्रवास दादर स्थानकातच रद्द करण्यात येणार आहे. १२१३४ मंगळुरू-सीएसएमटी गाडी ठाणे स्थानकात रद्द करण्यात येणार आहे. त्यानंतर रिकामी गाडी स्वच्छतेसाठी यार्डात जाणार आहे.