मुंबई : राजकीय पटलावर एकमेकांविरुद्ध जोरदार राजकीय शरसंधान साधणारे दिग्गज नेते गुरुवारी (दि.२९) कलेच्या आणि हास्याच्या धाग्याने एकत्र आले. ज्येष्ठ आणि प्रसिद्ध व्यंगचित्रकार प्रशांत कुलकर्णी यांच्या ‘महाराष्ट्राच्या हास्यरेषा’ या व्यंगचित्र संग्रहाचे प्रकाशन शिवाजी पार्क येथील स्वातंत्र्यवीर सावरकर राष्ट्रीय स्मारकाच्या सभागृहात मोठ्या उत्साहात पार पडले. या कार्यक्रमाच्या निमित्ताने मुख्यमंत्री देवेंद्र फडणवीस, शिवसेना पक्षप्रमुख उद्धव ठाकरे आणि महाराष्ट्र नवनिर्माण सेनेचे अध्यक्ष राज ठाकरे हे तिघेही एकाच मंचावर एकत्र आल्याने उपस्थितांच्या डोळ्यांचे पारणे फिटले.
आपल्या कुंचल्याने महाराष्ट्राच्या सामाजिक व राजकीय घडामोडींवर वर्षानुवर्षे अचूक भाष्य करणाऱ्या प्रशांत कुलकर्णी यांच्या कलाप्रवासाचा गौरव करण्यासाठी या विशेष कार्यक्रमाचे आयोजन करण्यात आले होते. एरवी राजकीय आखाड्यात परस्परांवर टीकास्त्र सोडणारे हे नेते व्यासपीठावर एकत्र आल्यामुळे सभागृहात प्रचंड उत्सुकता होती. नेत्यांनीही आपल्या भाषणात राजकीय कटुता बाजूला ठेवून एकमेकांना मिश्कील चिमटे काढत हास्याची दाद दिली.
कार्यक्रमादरम्यान उपस्थितांना संबोधित करताना, एका चांगल्या व्यंगचित्रात हजार शब्दांची ताकद असते आणि प्रशांत कुलकर्णी यांनी आपल्या व्यंगचित्रांच्या माध्यमातून महाराष्ट्राची राजकीय संस्कृती जिवंत ठेवली आहे, असा सूर सर्वपक्षीय नेत्यांच्या भाषणातून उमटला. कोणत्याही पूर्वग्रहाशिवाय नेत्यांमधील विसंगतीवर मार्मिक बोट ठेवण्याचे धाडस व्यंगचित्रकारच करू शकतात, अशा शब्दांत कुलकर्णी यांच्या कलेचे कौतुक करण्यात आले.
‘महाराष्ट्राच्या हास्यरेषा’ या पुस्तकात प्रशांत कुलकर्णी यांनी गेल्या काही दशकांत रेखाटलेल्या निवडक आणि गाजलेल्या व्यंगचित्रांचा समावेश करण्यात आला आहे. सत्ताकारण, समाजकारण आणि जनसामान्यांचे प्रश्न यांना मिश्कीलपणे मांडणाऱ्या या चित्रांच्या माध्यमातून महाराष्ट्राचा समकालीन राजकीय इतिहास उलगडतो.
कार्यक्रमाला विविध क्षेत्रांतील मान्यवर, ज्येष्ठ पत्रकार, साहित्यिक, कलाकार तसेच मोठ्या संख्येने नागरिक उपस्थित होते. राजकीय मतभेद आणि पक्षाच्या सीमा ओलांडून केवळ कलेच्या सन्मानासाठी घडलेल्या या एकत्र येण्यामुळे हा प्रकाशन सोहळा दीर्घकाळ स्मरणात राहणारा ठरला.