डोंबिवली : रस्त्यामधून चालणाऱ्या दोन जणांना कार चालकाने हॉर्न वाजवून बाजुला होण्याचा इशारा दिला. त्याचा राग आल्याने पादचाऱ्यांनी संबधित कारची रात्रीच्या वेळेत तोडफोड केली. त्यानंतर झालेल्या वादातून एकाने कार चालकाच्या कानशिलाला पिस्तूल लावून ठार मारण्याची धमकी दिली. हा सारा प्रकार डोंबिवली पूर्वेतील मानपाडा रोडला असलेल्या सांगाव येथील रविकिरण सोसायटी (चेरानगर) भागात सोमवारी रात्री घडला. या प्रकरणात मानपाडा पोलिसांनी दोन जणांना अटक केली आहे. यामधील काही जण सराईत गुन्हेगार असल्याचे पोलिसांच्या निदर्शनास आले आहे
कैलास भंडारी, रोशन लोखंडे, शिवम त्रिपाठी, नीतेश गुप्ता, तेजस म्हात्रे, नीर गोपाळ बुटेला आणि ओमकार मांडरे अशी गुन्हा दाखल झालेल्या तरूणांची नावे आहेत. त्यांच्यावर गुन्हा दाखल करण्यात आला आहे. या संदर्भात पोलिस सूत्रांकडून मिळालेल्या माहितीनुसार, सोमवारी रात्रीच्या सुमारास तक्रारदार नीलेश भोईर यांचा चुलत भाऊ जनार्दन भोईर आणि त्यांचे कुटुंबीय कारने सांगाव मधील त्यांच्या घरी परतत होते. भिका म्हात्रे चाळीजवळील रस्त्यावर दोन इसम रस्त्याच्या मधून चालले होते. जनार्दन यांनी कारचा हॉर्न वाजवून त्यांना बाजुला होण्याची सूचना केली. त्यावेळी दोघांनी जनार्दन यांच्याकडे रागाने बघितले. दुसऱ्या दिवशी सकाळी भोईर कुटुंबीयांना घरासमोरील कारची काच फोडल्याचे दिसली. त्याचवेळी दोघे संशयित त्याठिकाणी आले. त्यातील एकाने कमरेला खोचलेले पिस्तूल बाहेर काढून नीलेश भोईर यांच्या कानशिलाला लावून जीवे मारण्याची धमकी दिली. भोईर कुटुंबीयांनी ओरडाओरडा केल्यानंतर दोन्ही तरूण पळून जाऊ लागले . भोईर कुटुंबीयांनी त्यांचा पाठलाग केला पण ते इमारतीमधून पळून गेले. त्यांच्या जवळील बॅग त्यांनी मोरेश्वर पार्क इमारतीच्या एका कोपऱ्यात फेकली होती. ही बॅग घेण्यासाठी एक तरूण आला असता जमावाने त्याला पकडून ठेवले. पोलिसांनी घटनास्थळी येऊन बॅगची तपासणी केली. या बॅगमध्ये पिस्तूल, तीन जिवंत काडतुसे, 3 लोखंडी चॉपर आढळले.
जमावाने पकडलेल्या तरूणाचे नाव नीर बुटेल (रा. 18, रा. नांदिवली) असल्याचे पोलिसांच्या चौकशीत उघड झाले. नीलेश यांना पिस्तुलाने धमकाविणाऱ्या तरूणांची नावे शिवम त्रिपाठी आणि नीतेश गुप्ता असल्याचे तपासात उघडकीस आले आहे. कल्याण पूर्वेनंतर सांगाव भागात गुंड-गुन्हेगारांची वळवळ वाढली आहे. अशांचा बंदोबस्त करण्यासाठी या भागात पोलिस गस्त वाढविण्याची मागणी रहिवासी करत आहेत.