Ghatkopar Landslide News : मुसळधार पावसामुळे मुंबईतील घाटकोपर पूर्व येथील अशोक नगर, चिराग नगर भागातील गौसिया चाळीवर मध्यरात्री ३ ते ४ घरांवर अचानक दरड कोसळल्याची भीषण दुर्घटना घडली. १२ ऑगस्ट रोजी पहाटे ३:४८ च्या सुमारास घडलेल्या या घटनेत दोन जणांचा दुर्दैवी मृत्यू झाला असून ढिगाऱ्याखालून त्यांचे मृतदेह बाहेर काढण्यात आले आहेत. घटनास्थळी अद्यापही बचावकार्य सुरू आहे.
मिळालेल्या माहितीनुसार, रात्रभर पडणाऱ्या संततधार पावसामुळे राठोड मेडिकलजवळील टेकडीचा भाग खचून गौसिया चाळीतील २ ते ३ घरांवर कोसळला. घटनेची माहिती मिळताच मुंबई महानगरपालिकेचे अग्निशामक दल, स्थानिक पोलीस, वॉर्ड कर्मचारी, १०८ रुग्णवाहिका आणि वीज वितरण कंपनीचे पथक तातडीने घटनास्थळी दाखल झाले. या दुर्घटनेत आतापर्यंत दोघांचा मृत्यू झाला आहे. तर तिघांना रुग्णालयात दाखल करण्यात आले आहे.ढिगाऱ्याखाली काही रहिवासी अडकल्याची भीती असल्याने आपत्कालीन पथकांकडून शोध व बचावकार्य राबवले जात आहे.
या बचावकार्यादरम्यान दुर्घटनाग्रस्त भागात काम करताना अग्निशमन दलाचे जवान मनोज सोनवणे (वय ३०) आणि शिवम द्विवेदी (वय २९) हे जखमी झाले. त्यांना तातडीने कूपर रुग्णालयात उपचारासाठी दाखल करण्यात आले होते. डॉक्टरांनी प्राथमिक उपचार केल्यानंतर दोघांनाही रुग्णालयातून सुखरूप घरी सोडले आहे.सध्या परिसरात सुरक्षेचा उपाय म्हणून पोलीस बंदोबस्त तैनात करण्यात आला असून, बचावकार्य सुरु आहे.
महापालिका अधिकारी गजानन जैतापकर यांनी माध्यमांशी बोलताना सांगितले की, " रहिवाशांना नोटिसा बजावण्यात आल्या आहेत. यापूर्वीही, पावसाळ्याआधी अनेक घरांना नोटिसा देण्यात आल्या होत्या. बचावकार्य सुरू आहे. आम्ही पुढील कार्यवाहीबाबत निर्णय घेत आहोत. बाधित भागातील लोकांना सुरक्षित ठिकाणी हलवले जाण्याची शक्यता आहे.
या नैसर्गिक आपत्तीबाबत माहिती देताना पोलिस उपायुक्त गणेश शिंदे यांनी सांगितले की, "पावसामुळे घाटकोपर पोलिस ठाण्याच्या हद्दीतील अशोकनगर भागात दरड कोसळण्याची घटना घडली आहे. आतापर्यंत दोन मृतदेह बाहेर काढण्यात आले असून बचावकार्य सुरू आहे. येथे पोलिस कर्मचारी तसेच बचावकार्यासाठी आवश्यक असलेली सर्व पथके - ज्यामध्ये बीएमसी (BMC), एनडीआरएफ (NDRF) आणि इतर यंत्रणांच्या अधिकाऱ्यांचा समावेश आहे - तैनात करण्यात आली आहेत. ही घटना पहाटे ३ च्या सुमारास घडली. यात ४-५ जण अडकल्याची शक्यता आहे."