नवी मुंबई : गणेशोत्सव काळात मुंबई-पुणे द्रुतगती व मुंबर्ई-गोवा महामार्गावरून गणेशभक्तांचा निविघ्न व कोंडीमुक्त प्रवास होईल यासाठी पोलिसांनी तत्पर राहा असे आवाहन करीत या काळात मुंबई -गोवा महामार्गावर 23 ठिकाणी रुग्णवाहिका व दर 15 किलोमीटरवर सुविधा केंद्रही उभारण्यात येणार असल्याचे पोलीस महासंचालक (वाहतूक) प्रविण साळुंके यांनी सांगितले.
नवी मुंबई पोलीस आयुक्तालयाच्या कॉन्फरन्स हॉलमध्ये शुक्रवारी समन्वय बैठक झाली. यावेळी मुंबई-गोवा राष्ट्रीय महामार्गावरील ब्लॅक स्पॉट, रस्ते दुरुस्ती तसेच इतर अडचणींबाबत चर्चा करण्यात आली. गणेशोत्सवादरम्यान शासनाच्या विविध विभागांनी यावर कार्यवाही करावी असे निर्देश देण्यात आले. राष्ट्रीय महामार्ग क्र. 66 वरील वाहनांची वर्दळ नियंत्रीत करण्यासाठी विशेष नियोजन करण्यात येणार असून, नागरिकांनी देखील प्रशासनाला सहकार्य करावे, असे आवाहन यावेळी करण्यात आले.
या बैठकीस रायगड पोलीस अधिक्षक (महामार्ग) तानाजी चिखले, नवी मुंबई पोलीस उपायुक्त तिरुपती काकडे, महाराष्ट्र राज्य रस्ते विकास महामंडळ, आय.आर.बी, सार्वजनिक बांधकाम विभाग, राज्य परिवहन महामंडळ, आरोग्य विभाग या विभागातील अधिकारी तसेच कोकण विभागातील पोलीस अधिक्षक, अपर पोलीस अधिक्षक, सहायक पोलीस अधिक्षक, पोलीस उपनिरीक्षक, पुणे विभागाचे महामार्ग पोलीस अधिक्षक उपस्थित होते.
यावेळी पोलीस प्रशासनामार्फत वाहतुकीचे विशेष नियोजन करण्यात आले असल्याची माहिती साळुंके यांनी दिली. मुंबई-पुणे द्रृतगती महामार्गावर गणेशोत्सव काळात वाहतूक कोंडी होऊ नये यासाठी डेल्टा फोर्स व पेट्रोलिंग वाहनांची गस्त वाढविण्यात आली आहे. वाहतूक सुरक्षिततेच्या दृष्टीने आवश्यक त्याठिकाणी सुचना फलक, रंबलर स्ट्रीप, गतीरोधक फलक, वाहतूक नियंत्रण सुचना फलक लावण्यात आले आहेत. घाट क्षेत्रातील दरड कोसळणार्या ठिकाणी लोखंडी जाळ्या लावण्यात आल्या आहेत. महामार्ग क्र. 48 वर किरकोळ दुरुस्तीअंतर्गत खड्डे बुजविणे, लेन मार्किंग करणे, माहिती फलक स्वच्छ करणे इत्यादी कामे पूर्ण झाली आहेत.
बोर घाटात अपघात कालीन परिस्थिती उद्भवल्यास एकूण 4 ठिकाणी वाहतूक नियंत्रण व नियोजन करण्यासाठी घाट निरिक्षक प्रतिसाद पथक 24 तास तैनात करण्यात आले असल्याचे यावेळी सांगण्यात आले.
अपघातमुक्त प्रवास
प्रवासादरम्यान महामार्गावर वाहतूक कोंडी होणार नाही यासाठी एसटी महामंडळाच्या चालक आणि वाहकांना विशेष सूचना देण्यात आल्या आहेत. अपघात टाळण्याकरिता त्यांची अल्कोहोल चाचणी करण्यात येणार आहे. सहा अपघातप्रवण क्षेत्रात महाराष्ट्र राज्य परिवहन मंडळाचे फिरते पथक तैनात ठेवण्यात येणार आहेत.
नियोजन असे
मुंबई-पुणे द्रुतगती व मुंबई-गोवा महामार्गावर दर 15 कि.मी. अंतरावर सुविधाकेंद्र उभारण्यात येणार असून, या सुविधा केंद्रात पोलीस मदत कक्ष, आरोग्य विषयक सुविधा, शौचालय, चहापान कक्ष, स्तनदा मातांसाठी स्वतंत्र कक्ष तयार करण्यात येणार आहेत. वाहनांच्या दुरुस्तीचीही व्यवस्था करण्यात येणार आहे. वैद्यकीय मदतीसाठी मुंबई-गोवा महामार्गावर 23 ठिकाणी रुग्णवाहिका तैनात ठेवण्यात येणार आहेत. आपत्ती व्यवस्थापनासाठी विशेष नियोजन करण्यात आले आहे.