मुंबई : धारावी पुनर्विकास प्रकल्पाने (डीआरपी) धारावी प्रकल्पात येणार्या पात्र-अपात्र झोपडपट्टीवासियांची प्राथमिक यादी अर्थात प्रारुप परिशिष्ट - 2 नुकतेच प्रसिद्ध केलेले आहे. या प्राथमिक यादीत 80 टक्के झोपडपट्टीवासियांना अपात्र केले आहे, असा आरोप करीत धारावी बचाव आंदोलनाचे नेते, कार्यकर्ते यांनी या यादीची होळी काल गुरुवारी धारावीत करण्याचा प्रयत्न केला.परंतु धारावी पोलिसांनी ही यादी आमदार महेश सावंत, माजी आमदार बाबुराव माने यांच्या हातातून हिसकावून घेऊन त्यांचा हा प्रयत्न उधळून लावला.आणि कायदा सुव्यवस्थेचा प्रश्न निर्माण होईल असे कारण देत या यादीची होणारी होळी धारावी पोलिसांनी रोखली.
धारावी बचाव आंदोलन या संघटनेने हे आंदोलन विभाग प्रमुख आमदार महेश सावंत यांच्या नेतृत्वाखाली केले. या आंदोलनात शिवसेना उद्धव बाळासाहेब ठाकरे पक्षाचे विभाग प्रमुख आमदार महेश सावंत, माजी आमदार बाबुराव माने, गणेश खाड्ये, जोसेफ कोळी, गंगा देरबेर, महादेव शिंदे, एस.सावंत, शेकापचे राजेंद्र कोरडे, राष्ट्रवादी शरद पवार पक्षाचे उल्लेश गजाकोष, बसपाचे शामलाल जैस्वाल, आपचे राफेल पॉल आदी सहभागी झाले होते.
डीआरपीची यादी म्हणजे अदानीने काढलेली पात्र-अपात्र झोपडपट्टीवासीयांची बोगस यादी आहे. या यादीचे चार कागद जाळणे म्हणजे मोठा कायदा सुव्यवस्थेचा प्रश्न निर्माण होणे हे पोलिसांचे तर्कट अजब आहे. हे मनाला पटत नाही. म्हणून आम्ही धारावी बचाव आंदोलनाचे सर्व पदाधिकारी, नेते पोलिसांचा निषेध करीत आहोत, असे बाबुराव माने यांनी म्हटले आहे.
धारावीतच धारावीकरांना 500 चौ.फू.ची घरे द्या, नाहीतर आमचे आंदोलन यापुढेही चालूच राहणार आहे. कोणालाही अपात्र करू नका सगळ्यांना घरे द्या ही आमची भूमिका आहे, असेही बाबुराव माने यांनी सांगितले.