मुंबई : माय मराठी भाषेला अभिजात भाषेचा दर्जा मिळाल्याने आता मराठीचा डंका अधिक जोमाने सर्वत्र वाजणार आहे. मराठी भाषेच्या संवर्धन आणि विकासासाठी मुंबईत होत असलेले मराठी भाषा भवन उत्तम आणि दर्जेदार व्हावे. भाषा भवनाच्या माध्यमातून मराठी भाषा अधिक समृद्ध आणि प्रगल्भ करण्यासाठी अधिक जोमाने काम करूया, असे प्रतिपादन मुख्यमंत्री एकनाथ शिंदे यांनी केले.
चर्नीरोड येथील जवाहर बाल भवन येथे उभारण्यात येणार्या ‘मराठी भाषा भवन’चे भूमिपूजन मुख्यमंत्र्यांच्या हस्ते आभासी प्रणालीद्वारे करण्यात आले. या समारंभास विधानसभा अध्यक्ष राहुल नार्वेकर, शालेय शिक्षण आणि मराठी भाषा मंत्री दीपक केसरकर, कौशल्य विकास मंगलप्रभात लोढा, विधान परिषद उपसभापती डॉ. नीलम गोर्हे, ज्येष्ठ साहित्यिक मधू मंगेश कर्णिक, मराठी भाषा सल्लागार समितीचे अध्यक्ष डॉ. लक्ष्मीकांत देशमुख आदी उपस्थित होते.
मुख्यमंत्री शिंदे म्हणाले, मराठी भाषा भवनासाठी चांगली जागा उपलब्ध झाली असून भवनाचे भूमिपूजन सागराच्या साक्षीने होत आहे याचा आनंद होत आहे. भाषा भवनसाठी साहित्यिक व अन्य क्षेत्रातून आलेल्या सूचनांचा आदर केला जाईल, असेही ते म्हणाले. मंत्री केसरकर यांनी सांगितले की, मराठी भाषिकांना आणि साहित्यिकांना अभिमानास्पद वाटेल असे भाषा भवन उभारले जाईल. सातारा येथे विश्वकोश मंडळासाठी नवीन इमारत आणि त्याचबरोबर प्रत्येक जिल्ह्यात पुस्तकाचे गाव होणार आहे.