नवी मुंबई: नवी मुंबईतील कृषी उत्पन्न बाजार समिती (एपीएमसी) फळबाजारात आंब्यांची आवक वाढल्याने दरात लक्षणीय घसरण झाली आहे. हंगामाच्या अखेरच्या टप्प्यात कोकण, कर्नाटक आणि गुजरातमधून मोठ्या प्रमाणात आंबा बाजारात दाखल होत असल्याने ग्राहकांना कमी दरात आंबा उपलब्ध होत आहे. याचबरोबर विविध परदेशी फळांची आवकही वाढल्याने फळबाजारात स्पर्धा निर्माण झाली असून ग्राहकांना अनेक पर्याय उपलब्ध झाले आहेत.
एपीएमसी फळबाजारात गेल्या काही आठवड्यांच्या तुलनेत हापूस आणि केशर आंब्यांच्या दरात 15 ते 20 टक्क्यांपर्यंत घट झाली आहे. सध्या रत्नागिरी व देवगड हापूस 250 ते 450 रुपये किलो, केशर आंबा 150 ते 250 रुपये किलो, तर कर्नाटक पायरी आंबा 100 ते 200 रुपये डझन दराने विक्री होत आहे.
आंब्याच्या वाढलेल्या पुरवठ्यामुळे किरकोळ ग्राहकांसह व्यापाऱ्यांनाही दिलासा मिळाला आहे.तर सफरचंद, डाळिंब, मोसंबी, संत्री, द्राक्षे आणि चिकू यांच्या दरात फारसा बदल झालेला नसून हे दर स्थिर आहेत. सफरचंद 200 ते 300 रुपये किलो, डाळिंब 150 ते 250 रुपये किलो, मोसंबी 80 ते 120 रुपये किलो आणि द्राक्षे 80 ते 150 रुपये किलो दराने विकली जात आहेत.
उन्हाळ्याच्या पार्श्वभूमीवर कलिंगड, टरबूज आणि पपईची मागणीही कायम आहे. कलिंगड 15 ते 25 रुपये किलो, टरबूज 20 ते 30 रुपये किलो, तर पपई 20 ते 40 रुपये किलो दराने उपलब्ध आहे. शाळांना सुट्टी लागल्याने आणि विवाह सोहळ्यांचा हंगाम सुरू असल्याने फळांची मागणी टिकून असल्याचे व्यापाऱ्यांनी सांगितले.
याशिवाय एपीएमसी बाजारात ड्रॅगन फ्रूट, किवी, लिची, पीच, पेरू आणि इतर आयातीत फळांची आवक वाढली आहे. विशेषतः ड्रॅगन फ्रूट आणि किवीला ग्राहकांकडून चांगला प्रतिसाद मिळत असून आरोग्याबाबत जागरूक ग्राहक या फळांना प्राधान्य देत आहेत.
जून महिन्याच्या पहिल्या आठवड्यापर्यंत आंब्याची आवक सुरू राहण्याची शक्यता असून त्यानंतर हळूहळू हंगाम संपुष्टात येईल. सध्या वाढलेल्या पुरवठ्यामुळे दर नियंत्रणात असून ग्राहकांना दर्जेदार फळे परवडणाऱ्या किमतीत उपलब्ध होत आहेत. त्यामुळे नवी मुंबई एपीएमसी फळबाजारातील उलाढालीतही वाढ होत आहे.