पुणे, पुढारी वृत्तसेवा : औरंगाबाद जिल्हा क्रीडा अधिकारी कार्यालयांतर्गत शहरात वितरित करण्यात आलेल्या क्रीडा साहित्यातील गैरव्यवहार प्रकरणी जिल्हा क्रीडा अधिकारी कविता नावंदे यांच्यावर निलंबनाची कारवाई करण्यात आली आहे.
याबाबत महाराष्ट्र शासनाचे उपसचिव सुनील हंजे यांनी आदेश काढले आहेत. नावंदे यांचा कार्यभार औरंगाबाद विभागीय क्रीडा संकुलाचे उपसंचालक यांच्याकडे तात्पुरता सोपविण्यात आला आहे. या निलंबनाच्या कार्यकाळात त्यांना निर्वाह भत्ता देण्यात येणार असून, खासगी नोकरी अथवा व्यवसाय करता येणार नाही, असेही या आदेशात म्हटले आहे.