उमरगा, पुढारी वृत्तसेवा : जकेकुर चौरस्त्या येथून पुण्याला प्रवासी घेऊन जाणाऱ्या खाजगी ट्रॅव्हल्स बसची आयशर ट्रकला जोरदार समोरा समोर धडक बसून ट्रक चालक जागीच ठार झाला. तर ट्रॅव्हल्स बस मधील दहा प्रवाशी जखमी झाले. ही घटना तालुक्यातील राष्ट्रीय महामार्गावरील बलसूर पाटी जवळ गुरुवारी (दि २१) रोजी रात्री साडे नऊ वाजण्याच्या सुमारास घडली.
याबाबत सविस्तर माहिती अशी की, सोलापूर येथून हैदराबादकडे भरधाव धावणारा आयशर कंटेनर ट्रक आणि जकेकुर चौरस्त्या येथून पुण्याला प्रवाशी घेऊन जाणारी खाजगी ट्रॅव्हल्सची समोरासमोर धडक बसून ट्रक चालक राजेंद्र शिवराम गेजगे (वय ४५ वर्षे रा .दाळिंब ता उमरगा) हा जागेवर ठार झाला. तर बस मधील दहा प्रवाशी जखमी झाले आहेत. प्रत्यक्ष दर्शनींनी सांगितले की चौरस्त्या येथून पुण्याकडे प्रवाशी घेऊन जाणारी खाजगी ट्रॅव्हल्स (क्रमांक एम एच ०९ ३६९९) ही बस पुण्याकडे जात होती तर सोलापूर येथून येणारा ट्रक (क्रमांक एम एच४६ बी बी ७९६५) या गाडीच्या चालकांने विरुद्ध दिशेने भरधाव वेगाने गाडी चालवून समोरून येणाऱ्या प्रवाशी बसला जोराची धडक दिली. या अपघातात बस मधील दहा प्रवाशी जखमी झाले आहेत.
शांताबाई यशवंत चिंचोरकर (वय ५० वर्षे रा पुणे), रेश्मा सुनील गायकवाड (वय २३ वर्षे), सुनील गोरोबा गायकवाड (वय ३० वर्षे), बाबाजी मगर कांबळे (वय २६ वर्षे, रा नागराळ ता उमरगा), रामलिंग मनोहर कुंभार (वय २५वर्षे, रा नाईचाकूर ता उमरगा), साणव्ही रमेश कोठमाळे (वय ७ वर्षे रा पुणे), राजू यशवंत चिंचोरकर (वय ३५ वर्षे, रा पुणे ), मनोज नामदेव भुसे (वय २९ वर्षे रा लातूर), अरुण बाबू पवार (वय ३३ वर्षे रा घोघी सांगवी ता शिरूर), अनंत पाळ बबन महादेव जांभळे (वय ३६ वर्षे गणेश वाडी ता लातूर) यांच्यावर उमरगा येथील उपजिल्हा रुग्णालयात उपचार सुरू आहेत. तर रामलिंग कुंभार व बबन जांभळे यांना पुढील उपचारासाठी हलविण्यात आले आहे. अपघाताची माहिती मिळताच उमरगा पोलीस ठाण्याचे स.पो.नि समाधान कवडे यांनी घटनास्थळी भेट देऊन जखमींना नरेंद्र महाराज नानिज धामच्या रुग्णवाहिकेने उपचारास दाखल केले.