Jintur police action
जिंतुर : शहरात घडलेल्या घरफोडी प्रकरणाचा उलगडा करण्यात पोलिसांना यश मिळाले. पोलिस ठाण्यात दाखल गुन्ह्यातील संशयिताला पोलिसांनी जेरबंद केले असून त्याच्याकडून चोरीस गेलेला मुद्देमालही ताब्यात घेण्यात आला आहे. पोलिसांच्या म्हणण्यानुसार, रात्रगस्ती दरम्यान उचललेल्या संशयितावर चौकशीतून या प्रकरणाचा धागा सापडला.
दि. २७ नोव्हेंबर रोजी रात्री गस्त घालत असताना पोलिसांना एकनाथ महादु मुंढे (वय ४५, रा.शेवडी, ता. जिंतुर) हा संशयास्पद परिस्थितीत फिरताना आढळला. पथकाने शिताफीने त्याला ताब्यात घेतले. त्याच्यावर कारवाई करण्यात आली. सदर कारवाई दरम्यान पोलिसांनी कसून चौकशी केली असता त्याने येथील पोलिस स्टेशन हद्दीत घरफोडी केल्याची कबुली दिल्याचा दावा पोलिसांनी केला आहे.
चौकशीत मिळालेल्या माहितीनुसार पोलिसांनी तपास जलद गतीने पुढे नेला व चोरीस गेलेला मुद्देमाल संशयिताकडून हस्तगत केला. तपास पथकाने दिलेल्या माहितीनुसार, घरफोडीतील चोरट्याचा शोध लागणे कठीण असताना रात्रगस्तीत संशयास्पद हालचालींवर आधारित केलेल्या चौकशीतून या गुन्ह्याचा उलगडा झाला. पुढील तपासांतून आणखी माहिती मिळण्याची शक्यता व्यक्त होत आहे.
ही कारवाई पोलीस अधीक्षक रविंद्रसिंह परदेशी, अप्पर पोलीस अधीक्षक सूरज गुंजाळ, सहाय्यक पोलीस अधीक्षक तथा उपविभागीय पोलीस अधिकारी जिवन बेनीवाल यांच्या मार्गदर्शनाखाली करण्यात आली. तपास व कारवाई पोनि.गजेंद्र सरोदे यांच्या नेतृत्वाखाली केली असून पथकात पोह. शिराळकर, पोह. पठाण, पोह. गुंगाणे, पोशि. कांबळे, पोशि. पांचाळ यांचा समावेश होता. शहरातील घरफोडी प्रकरणाचा छडा लावल्याने नागरिकांत समाधान व्यक्त होत आहे.