Raju Navghare Panel Win
वसमत : परभणी-हिंगोली जिल्हा मध्यवर्ती सहकारी बँकेच्या निवडणुकीत सहकार क्षेत्रातील ज्येष्ठ नेते राजू नवघरे यांच्या नेतृत्वाखालील पॅनेलने सलग दुसऱ्यांदा दणदणीत विजय मिळवला. पॅनेलने एकूण ५८ जागांवर विजय संपादन करत जिल्ह्यातील सहकार क्षेत्रातील आपले वर्चस्व कायम राखले.
मतमोजणीच्या सुरुवातीपासूनच नवघरे यांच्या पॅनेलने आघाडी घेतली होती. ही आघाडी अखेरपर्यंत कायम राहिल्याने त्यांच्या समर्थकांमध्ये उत्साहाचे वातावरण निर्माण झाले. निकाल जाहीर होताच वसमत शहरासह विविध ठिकाणी कार्यकर्त्यांनी फटाक्यांची आतषबाजी, गुलालाची उधळण आणि घोषणाबाजी करत जल्लोष साजरा केला.
विजयानंतर प्रतिक्रिया देताना राजू नवघरे म्हणाले, "हा विजय सभासद, शेतकरी आणि कार्यकर्त्यांनी दाखविलेल्या विश्वासाचे फलित आहे. बँकेच्या माध्यमातून शेतकरी, सभासद आणि सर्वसामान्यांना अधिक चांगल्या व पारदर्शक सेवा देण्यासाठी आम्ही कटिबद्ध आहोत."
या निकालामुळे परभणी-हिंगोली जिल्ह्यातील सहकार क्षेत्रात राजू नवघरे यांचे नेतृत्व पुन्हा एकदा अधोरेखित झाल्याचे बोलले जात आहे. दरम्यान, आता बँकेच्या अध्यक्ष व उपाध्यक्षपदाच्या निवडीकडे सहकार क्षेत्रासह राजकीय वर्तुळाचे लक्ष लागले आहे.