नांदेड : नांदेड जिल्ह्यात अवैध रेती उत्खनन व उपशाविरोधात पोलिसांनी मोठी मोहीम राबवत संबंधित व्यावसायिकांवर कारवाई केली. अप्पर पोलीस अधीक्षक सूरज गुरव यांच्या नेतृत्वाखाली नांदेड ग्रामीण पोलीस, स्थानिक गुन्हे शाखा आणि महसूल विभागाच्या सहभागातून ही धडक कारवाई करण्यात आली. या मोहिमेसाठी मोठा पोलीस फौजफाटा तैनात करण्यात आला होता. रविवारी (दि.११) पहाटे ३ वाजल्यापासून सुरू झालेली ही कारवाई सायंकाळी ७ वाजेपर्यंत सुरू होती.
मार्कंड, विष्णुपुरी, पिंपळगाव-निमजी, वाहेगाव आणि कल्लाळ या विविध ठिकाणी एकाच मोहिमेअंतर्गत कारवाई करण्यात आली. या ठिकाणांहून बोटी, फायबर बोटी, तराफे आणि रेती असा एकूण २ कोटी १ लाख रुपयांचा मुद्देमाल जप्त करण्यात आला. याशिवाय बोरगाव-लिंबगाव येथे १८ लाख रुपयांचा मुद्देमाल जप्त करण्यात आला. सर्व नमूद ठिकाणांवरील जप्त मुद्देमालाची एकत्रित किंमत २ कोटी १९ लाख रुपये असल्याचे दिलेल्या आकडेवारीतून स्पष्ट होते.
अवैध रेती उपशाला आळा घालण्यासाठी मोठ्या फौजफाट्यासह राबविण्यात आलेल्या या मोहिमेत विविध यंत्रणांनी समन्वयाने सहभाग घेतला. पहाटेपासून सायंकाळपर्यंत सुरू असलेल्या या कारवाईमुळे परिसरातील अवैध रेती उत्खननाच्या मुद्द्याला पुन्हा एकदा महत्त्व प्राप्त झाले आहे.