चाकूर : तालुक्यातील नळेगाव येथे घरगुती कारणावरून पत्नीने पतीचा दोरीने गळा आवळून खून केल्याची घटना उघडकीस आली. ही घटना मंगळवारी (दि.९) रात्रीच्या सुमारास घडली. याप्रकरणी पत्नीविरोधात बुधवारी (दि.१०) चाकूर पोलिसात गुन्हा दाखल करण्यात आला आहे. राजकुमार कांबळे (वय ४० वर्षे) खून झालेल्या पतीचे नाव आहे.
पोलिसांनी दिलेल्या माहितीवरून चाकूर तालुक्यातील नळेगाव येथील राजकुमार कांबळे हे मंगळवारी घरी असताना त्याच्या पत्नीबरोबर त्यांचे घरगुती कारणावरून भांडण झाले. यावेळी रागाच्या भारात पत्नी संगिता हिने राजकुमार यांच्या डोक्यावर व तोंड्यावर पोळपाट मारून त्यांना जखमी केले. त्यानंतर दोरीच्या सहाय्याने गळा आवळून त्यांचा खून केला.घटनास्थळी पोलीस उपविभागीय अधिकारी बी चंद्रकांत रेड्डी, पोलीस निरीक्षक दत्तात्रय निकम यांनी भेट दिली आहे. फिर्यादी संजीव किशन कांबळे यांच्या फिर्यादीवरून संगीता राजकुमार कांबळे यांच्या विरुद्ध चाकूर पोलिसांत गुन्हा दाखल करण्यात आला. याप्रकरणी पुढील तपास पोलीस उपनिरीक्षक राजेश घाडगे हे करीत आहेत.