चाकूर, पुढारी वृत्तसेवा : शिवणखेडहून नळेगाव येथे मोटार सायकलवर लग्नाला निघालेल्या पती पत्नीचा नांदगाव पाटीजवळ अपघात होवून त्या अपघातात पतीचा मृत्यू झाला असून पत्नी गंभीर जखमी झाल्याची घटना बुधवारी सकाळी ११ वाजताच्या सुमारास घडली आहे.
चाकूर तालुक्यातील शिवणखेड येथील विश्वनाथ केशव काटे वय ५० हे आपल्या पत्नी सुनंदा विश्वनाथ काटे वय ४५ यांना मोटारसायकल क्रमांक एम एच २४ आर १८६२ वरून नळेगाव येथे पाहुण्याच्या लग्न सोहळ्यास जात असताना शिवणखेडहून नांदगाव पाटीजवळ एम एच ४३ डी ९०३५ क्रमांकाच्या कारने जोराची धडक दिल्याने त्या अपघातात विश्वनाथ केशव काटे हे गंभीर जखमी होवून त्यांचा लातूर येथे एका हॉस्पीटलमध्ये उपचारादरम्यान मृत्यू झाला आहे.त्यांच्या पत्नी सुनंदा काटे ह्या गंभीर जखमी झाल्या असून त्यांचा पाय फॅक्चर झाला आहे.
मयत विश्वनाथ काटे हे शेतकरी कुटुंबातील असून त्यांच्या पश्चात गंभीर पत्नी सुनंदा काटे, त्यांच्या पश्चात ४ मुली १ मुलगा असा परिवार आहे. नांदगावपाटीजवळील अपघातात ही महिन्यातील तिसरी घटना असून या अपघातात आतापर्यंत अनेकांना आपला जीव गमवावा लागला असून राष्ट्रीय महामार्गाने अपघात होवू नयेत म्हणून उपाययोजना करणे गरजेचे आहे.