Hunger Strike Latur
अहमदपूर : पावसाने दीर्घकाळ दडी मारल्याने निर्माण झालेल्या दुष्काळसदृश परिस्थितीत शेतकऱ्यांना वाऱ्यावर सोडणार नाही, अशी ग्वाही उपमुख्यमंत्री एकनाथ शिंदे यांनी दिली. खंडाळी (ता. अहमदपूर) येथे अन्नत्याग आंदोलन करणारे विविध कार्यकारी सेवा सहकारी संस्थेचे चेअरमन व्यंकटराव पाटील यांच्याशी त्यांनी बुधवारी (दि. २३) व्हिडीओ कॉलद्वारे संवाद साधला. उपमुख्यमंत्र्यांच्या आश्वासनानंतर पाटील यांनी आपले अन्नत्याग आंदोलन स्थगित केले.
नियमित कर्जाची परतफेड करणाऱ्या शेतकऱ्यांना सरकारकडून सध्या जाहीर करण्यात आलेले ५० हजार रुपयांचे प्रोत्साहन अनुदान अपुरे असून, ते दोन लाख रुपये करण्यात यावे, या मागणीसाठी व्यंकटराव पाटील यांनी १७ सप्टेंबरपासून अन्नत्याग आंदोलन सुरू केले होते. त्यांच्या आंदोलनाला शेतकरी तसेच विविध स्तरांतून पाठिंबा मिळत होता. सरकारचे लक्ष वेधण्यासाठी २० सप्टेंबर रोजी सांगवी-सुनेगाव येथील राष्ट्रीय महामार्गावर शेतकऱ्यांनी रास्ता रोको आंदोलनही केले होते. या आंदोलनाला आमदार रोहित पवार यांनी भेट देऊन पाठिंबा दिला होता.
दरम्यान, शिवसेनेचे लातूर जिल्हा संपर्कप्रमुख आमदार मंगेश कुडाळकर यांनी बुधवारी आंदोलनस्थळी भेट दिली. यावेळी त्यांनी उपमुख्यमंत्री एकनाथ शिंदे यांच्याशी मोबाईलवरून व्हिडीओ कॉलद्वारे संपर्क साधला. यावेळी व्यंकटराव पाटील यांनी नियमित कर्जफेड करणाऱ्या शेतकऱ्यांवर वारंवार अन्याय होत असल्याचे सांगत दोन लाख रुपये प्रोत्साहन अनुदान देण्याची मागणी केली. त्यावर उपमुख्यमंत्री शिंदे यांनी मुख्यमंत्री आणि कृषिमंत्र्यांशी चर्चा करून याबाबत निर्णय घेण्याचे आश्वासन दिले.
२० सप्टेंबर रोजी सांगवी-सुनेगाव येथे राष्ट्रीय महामार्गावर झालेल्या रास्ता रोको आंदोलनाप्रकरणी ३१ शेतकऱ्यांवर पोलिसांनी गुन्हे दाखल केले आहेत. हे गुन्हे मागे घेण्यात यावेत, अशी मागणीही पाटील यांनी केली. त्यावर हे गुन्हे मागे घेण्यासाठी प्रयत्न करू, असे आश्वासन उपमुख्यमंत्री शिंदे यांनी दिले.
याशिवाय खंडाळी गावाला मन्याड धरणातून शेतीसाठी तसेच पिण्यासाठी पाणी उपलब्ध करून द्यावे, अशी मागणीही करण्यात आली. हा सिंचनाचा ज्वलंत प्रश्न असून, याबाबत प्रशासनाला सूचना देऊन योग्य ती कार्यवाही केली जाईल, असे शिंदे यांनी सांगितले.
२०२५ मधील पीकविम्यापोटी शेतकऱ्यांना सरसकट १७ हजार ५०० रुपये देण्यात यावेत, अशी मागणीही यावेळी करण्यात आली. शेतकऱ्यांच्या विविध मागण्यांबाबत सरकार सकारात्मक असून, सध्याच्या कोरड्या दुष्काळाच्या परिस्थितीत खरीप पिकांचे पंचनामे, पिण्याच्या पाण्याची व्यवस्था आणि जनावरांच्या चाऱ्याची सोय यासारख्या बाबींवर तातडीने कार्यवाही करणे आवश्यक असल्याचे उपमुख्यमंत्री शिंदे यांनी सांगितले.
‘उपोषण सोडा, सरकार तुमच्या पाठीशी आहे,’ असे आवाहन शिंदे यांनी केल्यानंतर व्यंकटराव पाटील यांनी अन्नत्याग आंदोलन स्थगित केले. यावेळी आमदार मंगेश कुडाळकर, माजी मंत्री विनायकराव पाटील यांच्यासह शेतकरी व विविध मान्यवर उपस्थित होते.