जालना : आशा वर्करच्या मानधनातून लाच मागितल्याप्रकरणी लाचलुचपत प्रतिबंधक विभागाने (एसीबी) जालना जिल्ह्यात यशस्वी सापळा कारवाई करत दोन महिलांना रंगेहाथ पकडले आहे. ही कारवाई बुधवारी (दि. १७) घनसावंगी तालुक्यात करण्यात आली.
या प्रकरणात श्रीमती कालिंदा राजकुमार बनसोडे (वय ३९, तालुका समूह संघटक, तालुका आरोग्य कार्यालय घनसावंगी) आणि सविता पांडुरंग म्हस्के (वय ४१, आशा वर्कर, घनसावंगी) अशी आरोपींची नावे आहेत. तक्रारदार या स्वतः आशा वर्कर असून त्यांचे ऑक्टोबर महिन्याचे मानधन खात्यात जमा झाल्यानंतर त्याच्या मोबदल्यात सहा महिन्यांसाठी दोन हजार रुपयांची लाच मागण्यात आली होती. पैसे देण्याची इच्छा नसल्याने तक्रारदारांनी दि. १६ डिसेंबर २०२५ रोजी लाचलुचपत प्रतिबंधक विभाग, जालना येथे लेखी तक्रार दाखल केली होती.
तक्रारीच्या पडताळणीत तालुका समूह संघटक कालिंदा बनसोडे यांनी लाचेची मागणी केल्याचे निष्पन्न झाले. तडजोडीनंतर सहा महिन्यांसाठी १ हजार रुपये स्वीकारण्याचे ठरवून ही रक्कम आशा वर्कर सविता म्हस्के यांच्याकडे देण्यास सांगितले. यानुसार दि. १७ डिसेंबर २०२५ रोजी दुपारी ३.४५ वाजता घनसावंगी येथील माळी गल्ली परिसरात सापळा रचण्यात आला. तक्रारदाराकडून लाचेची रक्कम स्वीकारताच आशा वर्कर सविता म्हस्के यांना पंचासमक्ष रंगेहाथ पकडण्यात आले. आरोपींकडून लाचेची रक्कम तसेच मोबाईल फोन जप्त करण्यात आले असून पुढील तपास सुरू आहे.
या कारवाईचे नेतृत्व पोलीस निरीक्षक कोमल शिंदे यांनी केले. पोलीस उपअधीक्षक बाळू जाधव यांच्या पर्यवेक्षणाखाली ही कारवाई पार पडली. लाचलुचपत प्रतिबंधक विभाग, जालना येथील सापळा पथकाने ही कारवाई यशस्वी केली.