Gondi police take action against sand mafia; Property worth Rs 35 lakh seized
जालना, पुढारी वृत्तसेवा : अंबड तालुक्यातील गोंदी पोलिसांनी आपेगाव येथील नदीपात्रात सुरू असलेल्या अवैध वाळू उपशावर कारवाई करून पोलिसांनी पस्तीस लाखांचा मुद्देमाल जप्त केला.
आपेगाव येथील गोदावरी नदीपात्रातून अवैधरीत्या वाळू उपसा होत असल्याची माहिती मिळताच जमादार फुलचंद हजारे, पोलिस कर्मचारी प्रदीप हावाले व चालक वैद्य यांनी घटनास्थळी धाव घेतली. यावेळी अवैधरीत्या ट्रक व ट्रॅक्टरमधून अवैध वाळू उपसा करणाऱ्या वाळूमाफियांनी पोलिसांना पाहून पळ काढण्याचा प्रयत्न केला.
जमादार फुलचंद हजारे, प्रदीप हावाले यांनी ३५ लाखांचा मुद्देमाल कारवाईत जप्त केला. प्रकाश ऊर्फ पप्पू भगवान भालेकर (रा. आ-पेगाव) व ट्रकचालक सोमनाथ चांगदेव कोहक (रा. शेवगाव ता. शेवगाव जिल्हा अहिल्यनगर) यास पोलिसांनी ताब्यात घेतले.
कारवाई दरम्यान मनोज कल्याण नाटकर (रा. गेवराई), मंगेश ऊर्फ सोन्या पिता माउली चौधरी (रा. आपेगाव) यांच्यासह सोमनाथ चांगदेव कोहक व प्रकाश ऊर्फ पप्पू भगवान भालेकर यांच्यावरही लोडरच्या सहाय्याने गोदावरी नदीपात्रातून अवैधरीत्या वाळू उपसा केल्याच्या आरोपावरून गोंदी पोलिस ठाण्यात गुन्हे दाखल करण्यात आले आहेत.
पोलिसांच्या कारवाई दरम्यान ट्रॅक्टर, ट्रक, लोडर असा ३५ लाख रुपयांचा मुद्देमाल जप्त करण्यात आला आहे. कारवाईदरम्यान एक लोडर व कार घेऊन वाळूमाफिया पळून गेले. या प्रकरणाचा पुढील तपास पोलिस सहायक पोलिस फौजदार कंटुले हे करीत आहेत.