भोकरदन ः भोकरदन शहर व परिसरातील हॉटेल आणि खानावळ व्यवसायिकांकडून घरगुती गॅस सिलिंडरचा व्यावसायिक वापर होत असल्याच्या तक्रारींच्या पार्श्वभूमीवर प्रशासनाने विशेष तपासणी मोहीम राबवली. या मोहिमेत भोकरदन शहर व परिसरातील सुमारे 40 हॉटेल व खानावळींची तपासणी करण्यात आली. तपासणीदरम्यान 8 ठिकाणी घरगुती गॅस सिलिंडरचा व्यावसायिक वापर होत असल्याचे आढळून आले.
नियमबाह्य वापर आढळल्याने संबंधित 8 घरगुती गॅस सिलिंडर जप्त करण्यात आले असून ते संबंधित गॅस एजन्सीच्या ताब्यात देण्यात आले आहेत. ही कारवाई जिल्हाधिकारी आशिमा मित्तल, सहायक जिल्हाधिकारी बी. सर्वानन, जिल्हा पुरवठा अधिकारी सविता चौधर तसेच तहसीलदार ज्ञानेश्वर काकडे यांच्या मार्गदर्शनाखाली करण्यात आली.
या कारवाईत पुरवठा नायब तहसीलदार सदानंद नाईक, पुरवठा निरीक्षक संदीप गाढवे, पंजाब सुरडकर आदींच्या पथकाने सहभाग घेतला.
घरगुती गॅस सिलिंडरचा व्यावसायिक वापर करणे हा नियमबाह्य प्रकार आहे. नागरिकांना दिल्या जाणाऱ्या अनुदानित गॅसचा गैरवापर होऊ नये यासाठी प्रशासनाकडून नियमित तपासणी मोहीम राबवली जात आहे. नियमांचे उल्लंघन करणाऱ्यांवर पुढेही कठोर कारवाई करण्यात येईल.सदानंद नाईक (पुरवठा विभाग नायब तहसीलदार)