अंबाजोगाई; पुढारी वृत्तसेवा : तालुक्यातील मांडवा रोडवर काळवटी तांडा नजीक एक मानवी सांगाडा आढळून आल्याने खळबळ उडाली होती. अखेर अपर पोलीस अधीक्षक कविता नेरकर यांच्या मार्गदर्शनाखाली सांगाड्याच्या गळ्यातील एका माळेवरून या जटील खून प्रकरणाचा छडा लावण्यात अंबाजोगाई ग्रामीण पोलिसांना यश आले आहे. अनैतिक संबंधातून या गर्भवती महिलेची हत्या झाल्याचे निष्पन्न झाले असून पोलिसांनी परभणी जिल्ह्यातील आरोपीला बेड्या ठोकल्या आहेत.
अंबाजोगाई तालुक्यातील काळवटी तांडा नजीक दरीत मानवी सांगाडा आढळून आला होता. या घटनेची माहिती मिळताच अंबाजोगाई ग्रामीण पोलिसांनी घटनास्थळी धाव घेत सांगाडा ताब्यात घेऊन स्वाराती रुग्णालयात पाठवून दिला. या प्रकरणाचा तपास सहा. पोलीस निरिक्षक राजेंद्र घुगे यांच्याकडे सोपविण्यात आला.
सापडलेला सांगाडा पुरुषाचा आहे कि महिलेचा, आत्महत्या आहे की खून इथपासून तपासाची सुरुवात पोलिसांना करावी लागणार होती. प्रकरणाची क्लिष्टता लक्षात घेत अपर पोलीस अधीक्षक कविता नेरकर यांनी वैयक्तिक या तपासात लक्ष घातले. त्यांच्या आणि पोलीस निरिक्षक कोळी यांच्या मार्गदर्शनाखाली एपीआय घुगे यांनी तपास सुरु केला. मृतदेहाच्या गळ्यामध्ये एक माळ पोलिसांना आढळून आली होती. अशी माळ शक्यतो विधवा महिला गळ्यात घालतात अशी माहिती पोलिसांना मिळाली. त्याआधारे पोलिसांनी राज्यभरातील विशेषतः बीडसह आजूबाजूच्या कोणत्या जिल्ह्यात विधवा महिला बेपत्ता आहे का याचा शोध घेण्यास सुरुवात केली. यासाठी सीसीटीएनएस, सोशल मिडिया, बातम्या यांचाही आधार घेण्यात आला. दरम्यान, सोनपेठ (जि. परभणी) येथील ठाण्यात साधर्म्य असणारी महिला बेपत्ता असल्याचा सुगावा पोलिसांना लागला.
दरम्यान, मांडवा रोडवर महिलेचा मृतदेह आढळल्याची माहिती प्रसार माध्यमांवर प्रसिद्ध झाली. या माहितीनंतर अंबाजोगाई तालुक्यातील एका व्यक्तीने पोलीस ठाणे गाठले आणि त्याची बहिण दि. ६ एप्रिलपासून बेपत्ता असल्याचे सांगितले. मृतदेहाजवळ आढळलेल्या वस्तूंची ओळख देखील त्या व्यक्तीने पटवली. बेपत्ताची तक्रार झालेली महिला आणि या व्यक्तीची महिला एकच असल्याची खात्री पटल्याने पोलिसांना पुढील तपास करणे सोपे झाले. त्यानंतर पोलिसांनी केलेल्या डीएनए चाचणीतूनही संबंधित सांगाडा त्याच महिलेचा असल्याचे निष्पन्न झाले.
मयत महिलेच्या भावाने दिलेल्या फिर्यादीनुसार, पतीच्या निधनानंतर संबंधित महिला ७ वर्षीय मुलासह सासरी राहत होती. तिने स्वतःची शेतजमीन करण्यासाठी मदन भानुदास राठोड (रा. लक्ष्मीनगर तांडा, ता. सोनपेठ) याला दिली होती. दरम्यानच्या काळात सोनालीचे आणि मदन दोघांमध्ये अनैतिक संबंध निर्माण झाले. त्यातून संबंधित महिला गर्भवती राहिली. बदनामीच्या भीतीमुळे मदन गर्भपात करण्यासाठी सतत महिलेच्या मागे लागला होता. परंतु, ती गर्भपातासाठी आवश्यक असणारी कागदपत्रे मदनला देत नव्हती. यामुळे संतापलेल्या मदनने दि. ०६ एप्रिल रोजी या महिलेला अंबाजोगाई जवळील काळवटी तांडा येथील तळ्याची खोरी डोंगर उतारावर नेले. तेथे त्याने तिचा साडीने गळा आवळून तिचा खून केला. या फिर्यादीवरून मदन राठोड याच्यावर ग्रामीण पोलीस ठाण्यात खुनाचा गुन्हा नोंदवण्यात आला.
महिलेचा खून केल्यानंतर मृतदेह तिथेच टाकून मदन गावाकडे आला. काही झालेच नाही अशा अविर्भावात राहू लागला. दोन महिने उलटूनही कोणालाही काहीच पत्ता न लागल्याने तो निर्धास्त झाला होता. मात्र, अपर पोलीस अधीक्षक नेरकर यांच्या मार्गदर्शनाखाली एपीआय राजेंद्र घुगे यांनी सीसीटीएनएस, सोशल मिडिया आणि अत्याधुनिक तंत्रज्ञानाचा वापर करून बारकाईने तपास केला. गळ्यातील एका माळेवरून म्हणजेच अक्षरशः सुतावरून सुगावा गाठत पोलिसांनी या किचकट प्रकरणाचा उलगडा केला आणि आरोपीला बेड्या ठोकल्या. पोलिसांनी रविवारी (दि. १८) मदन याला अंबाजोगाई न्यायालयासमोर हजर केले असता त्यास आठ दिवसांची पोलीस कोठडी सुनावण्यात आली आहे.