सेनगाव: तालुक्यातील सावरखेडा येथील रोजगार सेवक भागवत बळीराम मुंढे (वय ३९) यास अॅट्रासिटीचा खोटा गुन्हा दाखल करण्याची धमकी दिल्याने त्याने औषध पिऊन जीवन संपवले. या प्रकरणी सेनगाव पोलिस ठाण्यात चौघांविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, १४ सप्टेंबर रोजी काही आरोपींनी घरकुलाचे पैसे त्यांच्या खात्यात जमा होत नसल्याच्या वादावरून भागवत मुंढे यांच्याशी वाद घालून त्यांचा अपमान केला आणि अॅट्रासिटीचा खोटा गुन्हा दाखल करण्याची धमकी दिली. या अपमानामुळे भागवत मुंढे याने विषारी औषध सेवन केले.
घटनेनंतर त्यांना तातडीने हिंगोलीतील खाजगी रुग्णालयात दाखल करण्यात आले. प्रकृती गंभीर असल्याने त्यांना पुढील उपचारासाठी मुंबईतील रुग्णालयात हलविण्यात आले, परंतु उपचारादरम्यान त्यांचा मृत्यू झाला.
या प्रकरणी २१ सप्टेंबर रोजी सेनगाव पोलिस ठाण्यात भागवत मुंढे यांनी दिलेल्या तक्रारीवरून दत्तराव कुंडलीक खंदारे, शेषराव लिंबाजी डाखोरे, सुभाष भागोराव डाखोरे, ज्ञानेश्वर आनंदराव नरवाडे यांच्याविरुद्ध गुन्हा दाखल केला आहे. मृत्यूचे शवविच्छेदन सेनगाव येथील रुग्णालयात करण्यात आले.
मयत भागवत मुंढे यांच्या पश्चात आई-वडील, पत्नी, एक मुलगा, एक मुलगी, भाऊ व भावजय असा परिवार आहे. या प्रकरणातील चारही आरोपींना पोलीस (सपोनि) दीपक मस्के, पोउपनि रविकिरण खंदारे, राजेश जाधव, तुकाराम मार्कड, टी. के. वंजारे, काशिनाथ शिंदे यांनी अटक केली आहे.