Heavy rain in Yermala area
रत्नापूर : पुढारी वृत्तसेवा
येडशी, येरमाळा परिसरात शनिवारी पहाटेपासून मुसळधार पावसाने हजेरी लावली. सतत कोसळणाऱ्या या पावसामुळे धाराशिव-संभाजीनगर महामार्गावरील वाहतूक जवळपास दोन तास ठप्प झाली. दरम्यान, या पावसामुळे शेतीच्या कामांना वेग आला असून, शेतकऱ्यांनी पेरणीपूर्व तयारी सुरू केली आहे.
कृषी विभागाच्या प्राथमिक माहितीनुसार येरमाळा आणि आजूबाजूच्या परिसरात सुमारे १८ मिलिमीटर पावसाची नोंद झाली आहे. या पावसामुळे शेतातील खड्डे, नाले, विहिरी तुडुंब भरल्या असून, जमिनीत ओलावा निर्माण झाला आहे. त्यामुळे खरीप हंगामाच्या पेरण्या लवकर सुरू होण्याची शक्यता आहे.
पावसाची चाहूल लागताच शेतकरी बांधव खते, बियाणे खरेदीसाठी गावातील कृषी केंद्रांवर गर्दी करू लागले आहेत. काही दुकानांपुढे शेतकऱ्यांच्या रांगा लागलेल्या दिसून आल्या. या पावसामुळे स्थानिक प्रशासनासमोर वाहतूक सुरळीत करण्याचे तसेच पाण्याच्या निचऱ्याचे आव्हान निर्माण झाले आहे. ग्रामपंचायतीकडून रस्त्यावरील अडथळे दूर करण्याचे काम हाती घेण्यात आले आहे.