धाराशिव : महिला बचत गटाच्या सचिवाने महिलांचा विश्वास संपादन करून लाखो रूपयांची फसवणूक केल्याची घटना धाराशिव जिल्ह्यातील तांदुळवाडी येथे घडली आहे. सचिव महिलेने बचत गट, भिसी आणि मायक्रो फायनान्सचे लाखो रुपये गोड बोलून घेतले. पैसे परत मागायला गेल्यावर अंगात दैवी शक्ती असल्याचे सांगत काळ्या जादूची भीती घातली. वंशाचा दिवा संपवण्याची धमकी दिली, असा दावा फसवणूक झालेल्या महिलांनी केला आहे. अंधश्रद्धा निर्मूलन समितीनेही गावाला भेट देऊन पिडित महिलांसोबत चर्चा केली आहे.
घरगाड्यात अडकलेल्या महिलांचं आर्थिक सक्षमीकरण करण्याचं काम बचत गट करतात. मात्र सक्षमीकरणाच्या वाटेवर बसलेल्या महिलांची आर्थिक फसवणूक करून त्यांच्या भोवती अंधश्रद्धेचा ट्रॅप लावण्याचा धक्कादायक प्रकार धाराशिवीमध्ये समोर आला आहे. धाराशिवमधील तांदुळवाडी येथील कुलस्वामिनी महिला बचत गटाच्या सचिवांनी महिलांना विश्वासात घेऊन फसवणूक केल्याचा आरोप बचत गटातील इतर महिलांनी केला आहे. अगोदर पैसे घेतले, पैसे परत मागायला गेल्यावर अंगात दैवी शक्ती असल्याच सांगत धमकावत असल्याचा महिलांचा आरोप आहे.
गावातील ४० हून अधिक महिलांची फसवणूक केली आहे. महिलांना काळ्या जादूची भीती दाखवली जाते. पैसे परत मागण्यासाठी गेलेल्या महिलांच्या घरात लिंबू, सुया, राख टाकण्याचे प्रकार सुरू झाले. वंशाचा दिवा संपवण्याची धमकी महिलांना दिली जाते. घरात राख, लिंबू टाकताना सीसीटीव्हीमध्ये कैद झाले आहे. महिला सचिवाने दोन संशयास्पद व्यक्तीकडून काळ्या जादूचे धडे घेतले असून गावात भीती पसरवण्याचा प्रयत्न केल्याचा आरोपही केला जात आहे. गावात भीतीच वातावरण असून अंधश्रद्धा निर्मूलन समितीने पिडित महिलांची भेट घेत समजूत घालण्याचा प्रयत्न केल्याची माहिती मिळत आहे.