Children Drown
वरठाण : उन्हाळ्याच्या सुट्टीत मामाकडे गेलेल्या भाच्यासह मामाचा मुलगा बैल धुण्यासाठी गेले असताना साठवण तलावात बुडून दोघांचा मृत्यू झाला. ही दुर्दैवी घटना शनिवारी दुपारी एक वाजेच्या सुमारास नांदगाव तांडा येथे घडली. या घटनेमध्ये एका तिसऱ्या बालकाचा जीव वाचविण्यात यश आले आहे. या घटनेमुळे परिसरात शोककळा पसरली आहे.
अकिल शकील पठाण (वय १८, रा.नांदगांव तांडा ता. सोयगाव) रेहान भिकन शेख (वय १५, रा. सातगाव डोंगरी ता. पाचोरा) अशी मृत्यू झालेल्यांची नावे असून साकिब कलंदर पठाण (वय १३) याला पाण्यात बुडताना असताना वाचविण्यात यश आले. यातील मयत रेहान भिकन शेख हा नांदगाव तांडा येथे मामा शकील पठाण याच्याकडे उन्हाळ्याच्या सुट्टीत नांदगाव तांडा येथे आला होता.
दरम्यान, शनिवारी हे तिघेही बैल धुण्यासाठी नांदगाव तांडा साठवण तलावाजवळ गेले असता, त्या तिघांनाही खोल पाण्याचा अंदाज न आल्यामुळे तिघेही पाण्यात बुडाले. साठवण तलावात कपडे धुणाऱ्या महिलांच्या लक्षात येताच त्यांतील मनीषा कैलास बागुल या अठरा वर्षीय मुलीने साठवण तलावात उडी घेऊन या तिघांना वाचविण्यासाठी तब्बल २३ मिनिटे पाण्याशी झुंज केली. त्यातील साकीब कलंदर पठाण हा तेरा वर्षीय बालक तिच्या हाती लागला.
दरम्यान, ग्रामस्थांनी घटनास्थळी धाव घेत अकिल पठाण, रेहान शेख यांचे मृतदेह पाण्यातून बाहेर काढले व शवविच्छेदनसाठी पाचोरा येथे खासगी रुग्णालयात पाठविले. पाण्यातून वाचलेल्या साकीब पठाण वर पाचोरा येथे खासगी रुग्णालयात उपचार सुरू आहेत. दरम्यान, सायंकाळी उशिरा महसूलच्या पथकाने घटनास्थळी भेट देऊन घटनेचा पंचनामा केला.