शिऊर : छत्रपती संभाजीनगर
मालेगाव महामार्गावरील शिऊर बंगला जवळील टूनकी येथील बळीराजा ढाब्याजवळ एक भीषण अपघात झाला. यामध्ये मध्य प्रदेशातील चौघांचा मृत्यू झाला. ही घटना (सोमवार) दि.२७ रोजी रात्री १०:३० वाजण्याच्या सुमारास घडली.
शिऊर पोलिसांनी दिलेल्या माहितीनुसार, पाच परप्रांतीय मजूर हे कर्नाटकवरून राजस्थानकडे निघाले होते. जड वाहतूक करण्याऱ्या ट्रक क्र.आर.जे ०९ जी.डी ३८५३ ने ते जात होते. त्यातील चार मजूर ट्रकच्या ट्रॉलीमध्ये झोपण्यासाठी गेले होते. अचानक चालकाने ब्रेक दाबल्याने त्या कंटेनर मधील लोखंडी प्लेट पुढे सरकली. त्या लोखंडी प्लेटच्या खाली दबून त्यांचा मृत्यू झाला. दिवाण मानसिंग, विजय कंवरलाल, निर्मल गरासिया, विक्रम कछावा असे मृत झालेल्या मजुरांची नावे असून त्यांचे वय अंदाजे २० ते २४ च्या दरम्यान होते.
सहायक पोलीस निरीक्षक वैभव रणखांब, पोलीस उपनिरीक्षक ओगले व सहकारी यांनी घटनास्थळी जाऊन मृतदेह बाहेर काढले. शिऊर येथील प्राथमिक आरोग्य केंद्रात शवविच्छेदन करण्यात आले. गुन्हा दाखल करण्याची प्रक्रिया शिऊर पोलीस ठाण्यात सूरु आहे.